ULetsholonyane nethemba lokujika izinto koweCAF
UMDLALI wasesiswini weSuperSport United, uReneilwe “Yeye” Letsholonyane, ukholwa wukuthi uma bengadlala ngokubambisana, benze konke ngendlela efanele, bangawaphendula amatafula kowomlenze wesibili weCAF Confederation Cup ngoMgqibelo ebusuku.
ISuperSport izogadulisana neTP Mazembe yaseDemocratic Republic of Congo (DRC), eLucas Moripe Stadium, ePitoli, ngo-8 ebusuku. Emlenzeni wokuqala iMazembe inqobe ngo 2-1 eLubumbashi.
Amatsatsantsa a Pitori anikwe ithemba lokuwina indebe yigoli lomdlali osemncane uSipho Mbule alishaye ekude. UMbule ungomunye wabadlali beSuperSport abasanda kukhushulelwa esikimini esikhulu okukhona kubona uTebogo Mokoena noFafrie Lakay.
Udlale emlenzeni wokuqala ngenxa yokuthi uLetsholonyane ubedonsa isigwebo samakhandi. Kulindeleke ukuthi umqeqeshi u-Eric Tinkler ambophele (uYeye) ngoMgqibelo.
“Badlale kahle ozakwethu sathola igoli ekuhambeni, uma ubheka ukuthi iningi labadlali abadlalile alijwayele. IMazembe iyiqembu elidlala kahle kodwa iyashayeka. Sakhe amathuba amaningi esiwombeni sokuqala kodwa sehluleka ukuwasebenzisa. Yona ithole amane, yashaya amagoli amabili. Uma senza konke ngendlela efanele, sibambisene, sizowuwina umdlalo.” kusho uLetsholonyane.
ULetsholonyane, oyibambe kwiKaizer Chiefs amasizini amaningi, usewine zonke izicoco eNingizimu Afrika. Amatsantsantsa adinga ukushaya igoli, iMazembe ingashayi lutho ukuze abe ngompetha beConfederation Cup okokuqala emlandweni wawo. Nokho iMazembe ikhombise ukuba yingozi ikakhulukazi uma ihlasela kowomlezwe wokuqala. La maqembu adlalile emidlalweni emibili esigabeni samaqoqo kwaba ngu 0-0 no 2-2 ngokulandelana.
“Sengiwine zonke izindebe lapha ekhaya. Kungaba mnandi futhi kungaba yinto enkulu ukuba ngumpetha we-Afrika. Sengiwine konke lapha ekhaya osekusele manje ukudla umhlanganiso ezwenikazi. Sinethuba lokuyiwina indebe ngoMgqibelo,” kusho uLetsholonyane.
“IMazembe inabadlali abanamava, isiyiwine kahlanu le ndebe. Abadlali bayo abatatazeli ebholeni.”
Nakuba iningi libabaza isibindi nekhono likaMbule odlale kwiMultichoice Diski Challenge ngempelasonto eyandulela umdlalo womlenze wokuqala kodwa uLetsholonyane uthe ubekulindele lokhu. Phambilini abadlali abasebancane beSuperSport baphumele obala ngokuthi uLetsholonyane obacathulisayo kuleli qembu ngokubagqugquzela nangeziyalo.
“Besihlale sazi emidlalweni kusuka kweyedlule ayidlalile, nengikubonayo uma siziqeqesha ukuthi unekhono futhi uzoba ngomunye wabadlali abaphezulu. Ngesonto eledlule udlale kahle emdlalweni omkhulu, washaya igoli,” kusho uLetsholonyane.
“Kuwumsebenzi wethu singabadlali abanamava ukusiza laba bafana, sisuka lapho nathi. Umsebenzi wethu wukuzama ukunciphisa amaphutha ukuze bezofika phezulu ngokushesha kunathi. Okwabo wukuzithoba baqhubeke nokusebenza kanzima.”