Uzocaba eyaphesheya ngokuchiliza uKhune
UNEPHUPHO lokuyodlala phesheya unozinti weKaizer Chiefs oyibamba kwiMultichoice Diski Challenge (MDC), uBruce Bvuma. UBvuma (22) kuke kwasuka umsindo ngaye kuvela ukuthi uhola amakinati ngemuva kokuthi edlalele iqembu elikhulu ngo-Ephreli ngemuva kokulimala kukaItumeleng Khune noBriliant Khuzwayo.
Lo nozinti usekudlulisile konke lokho njengoba ezimisele ngokuncela kozinti abadala bese ebagudluza endleleni yakhe yokudlala esikimini esikhulu.
“Ngifisa ukudlala phesheya kodwa kufanele ngiqale ngidlale kwiChiefs futhi ngenze kahle. Lokhu kuzonginika indawo eqenjini lesizwe okuzokwenza ngikwazi ukuwelela phesheya,” kusho uBvuma.
Akulula ukugudluza uKhune emapalini uma engalimele. Indaba yokulinda lokho iyazwela ngisho kwiphini lakhe uKhuzwayo okuke kwavela ukuthi iyamkhathaza indaba yokungadlali kodwa imenenja yakhe, uTim Sukazi, yakuphika lokho.
“Ngiyabahlonipha labo nozinti futhi ngizimisele ngokufunda kubona. Kodwa ekugcineni angizele ukuzokwandisa isibalo nami kumele ngilwele ukuthi ngidlale,” kusho uBvuma.
Uthe ukuxhumana kangcono nabadlali basenkundleni nokukhonya ebhokisini yikhona abona ukuthi kumele asebenze ukukulungisa.
Lokho angakwenza ngokusiza iChiefs ukuthi inqobe umdlalo wayo olandelayo weMDC okuzosho ukuqinisekisa ukuthi akudluli lutho kuyena.
Emdlalweni odlule Amakhosi abambane nabakhaya i-Orlando Pirates ngo 1-1.
NgoMgqibelo azodlala neChippa United eDobsonville Stadium ngo-10 ekuseni.
Amakhosi amancane aqeqeshwa nguArthur Zwane asanqobe umdlalo owodwa kweyisikhombisa, ahlulwa kwemihlanu.
Ukaputeni weqembu uNkosingiphile Ngcobo uhambe emazwini kaZwane ethi ukunqoba akubalulekile kodwa abakujabulelayo wukuthola ithuba lokudlala.
“Yebo imiphumela siyayidinga kodwa okusemqoka wukuthi sikhule njengabadlali ukuze sikwazi ukuthola ithuba lokudlala eqenjini elikhulu njengoba lesi kuyisigaba sokuzithuthukisa,” kusho uNgcobo. Imidlalo ye-MDC NgoMgqibelo: Kaizer Chiefs v Chippa United (10am, Dobsonville); Baroka FC v Bloem Celtic (12pm, Old Peter Mokaba); Cape Town City v Platinum Stars (12pm, Parow Park). NgeSonto: Golden Arrows v Polokwane City (10am, Princess Magogo Stadium); Orlando Pirates v Maritzburg United (12pm, Rand Stadium); Bidvest Wits v Mamelodi Sundowns (12pm, Sturrock Park); AmaZulu FC v Ajax Cape Town (12pm, Sugar Ray Xulu Stadium); Free State Stars v SuperSport United (8pm, TBA). THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.