Imidlalo ehlukene kowasoKhahlamba
KUZOHLUMULA ngolwazi lokubhukuda izingane zasezindaweni ezakhe uKhahlamba ngeDrakensberg Extravaganza okuyidili lemidlalo lensuku ezimbili kusuka kusasa kuze kube yiSonto.
Imidlalo ehlanganisa ezokusubatha, igalofu, imijaho yamabhayisikili nokunye, izonika izakhamuzi ithuba lokuzibonela abadlali beqophelo eliphezulu emikhakheni eyahlukene. Ngaphandle kwalokhu izingane zizothola ithuba lokufundiswa ngobungozi bamanzi nokubhukuda.
Ulwazi zizoluthola kubabhukudi abasezingeni elikhokhelayo. Sekunesikhathi uhulumeni eshumayela ngokubaluleka kokufundiswa kwezingane ngamanzi nokubhukuda kwazise imishophi lapho izingane ziminza khona isenzeka njalo ikakhulukazi ezindaweni ezinemifula.
Kusasa, okuwusuku lokuqala lwale midlalo yokuqala kodwa esizoba minyaka yonke, kuzoba khona neJT Gumede Memorial Lecture. Bathembisa lukhulu abaxhasi nabagqugquzeli bale midlalo esingabala kubona inkampani yabahleli iDrakensberg Productions, uMasipala uKhahlamba, KwaZulu Natal Department of Arts, Culture, Sports and Recreation, Drakensberg Tourism, Ukhozi FM, The Mecury neSolezwe.
USipho Ndaba ohlele leli dili le midlalo uthe balindele intokozo yodwa.
“Kusasa kuzobe kujabule abazifela ngemidlalo yasemanzini. Nabathanda ukugijima bazothola ithuba lokuzijabulisa ngeJosiah Gumede Marathon engu-23km. Abangebona ompetha ekugijimeni bahlalelwe i-Fun Run ezoba u-8km,” kusho kanje uNdaba.
Ayatholakala amathikithi e-Computicket nasezitolo zakwaShoprire/Checkers ngo-R150 ajwayelekile bese kuba u-R600 awomntakabani. Ngeminye imininingwane kungathunyelwa i-email ku: www.drakensbergextra@gmail. com noma bashayele ku: 0639836423.