Iseyinkinga eyasemapalini kweZimnyama
KUBONAKALA izinkinga zasemapalini kwi-Orlando Pirates zingakaxazululeki okungenye ebigqame kakhulu kuleli qembu ngesizini edlule ebe ngemnyama liqeda ngaphandle kwe-Top 8 kwi-Absa Premiership.
NgoLwesibili ngesikhathi iPirates ibambana ngo 0-0 neLamontville Golden Arrows e-Orlando Stadium bekuvimbe uJackson Mabokgwane.
UMabokgwane bekungokwesibili evimba njengoba kunguyena owayesemapalini ngesikhathi la maqembu ehlangene emdlalweni weTelkom Knockout owanqotshwa eZimnyama.
Ngaleso sikhathi ebuzwa umqeqeshi uMilutin “Micho” Sredojevic, ngokungabi khona kukaWayne Sandilands okunguyena oqale isizini, wathi ubefuna ukwenyusa ukuzethemba kuMabokgwane.
UMabokgwane ngomunye wonozinti abangazange benze umsebenzi oncomekayo emapalini ngesizini edlule esethole ithuba lokuvimba.
Nguyena obesemapalini bengenelwa amagoli ayisithupha bebhekene neMamelodi Sundowns. Bekuphekwa kuthululwa kwazise isizini edlule yayiqalwe uFelipe Ovono, kwangena uBrighton Mhlongo kwagcina sekudlulelwe kuMabokgwane.
Ekhuluma nabezindaba ngemuva komdlalo wangoLwesibili, uSredojevic, uthe: “Besisebenza noJackson Mabokgwane kula masonto amabili edlule. Kusasa kuqala omunye umbango wokuthi ngubani ozothatha ijezi. Akekho okhululekile.”
Omunye unozinti osemabhukwini eZimnyama uSiyabonga Mpontshane.
Ngemuva kokhuluma kanje, izolo iqembu likhiphe isitatimende “esicacisa” ngokungabi khona kukaSandilands.
Besithi ukungabi khona kuka lo nozinti bekungesikhona ngenxa yokushintsha amaqhinga kodwa kudalwe wukulimala.
Kula masonto amabili akhuluma ngawo uMicho, uSandilands ubeseqenjini lesizwe iBafana Bafana ebelinemidlalo yokuhlungela iNdebe yoMhlaba neSenegal.
Kuyona yomibili kuvimbe unozinti weKaizer Chiefs u-Itumeleng Khune.
“Ubuye eqenjini lesizwe ekhala ngokungakhululeki emsipheni ohlanganisa isihluzi nesithende. Ube esedluliselwa kudokotela omhlolile wathola ukuthi ulimele.
“Kulindeleke ukuthi aqale ukuziqeqesha ngokuhamba kwesonto,” kusho isitatimende esikhishwe kwi-website yeqembu.
USandilands ujoyine iPirates ekuqaleni kwesizini. Emidlalweni edlule ukhombise ubuthaka engenelwa amagoli alula bebhekene neSundowns nePolokwane City. Womabili amaqembu abehlula kwiligi nakwiTelkom Knockout ngokulandelana.
NgeSonto leli qembu lizovakashela iBloemfontein Celtic ekhombisa izimpawu zokuqina ngaphansi komqeqeshi uJulesic Veselin waseSerbia.
Umdlalo useDr Molemela Stadium ngo-3.30 ntambama.
USredojevic naye odabuka eSerbia uveze ukuthi uVeselin wayenguthisha wakhe kwezokuqeqesha.
UVeselin usebeke iCeltic emaqenjini amahlanu aphezulu kwi-log waphinde wayifaka kowamanqamu weTelkom Knockout abazodudulana kuyo neBidvest Wits ngoDisemba 2 ePrincess Magogo Stadium.