Ingcindezi yokuqoka abashwibi kumaProteas
INHLOKO yethimba labaqoki kumaProteas, uLinda Zondi, ivuma ingcindezi ababhekene nayo yokuqoka abashwibi abazogadla ngabo uma sebebhekene neZimbabwe emdlalweni weTest ngoDisemba 26 e-East London.
Abashwibi bamaProteas abebelimele sebeluleme futhi beza kahle emaqenjini abo kwiRam Slam T20 Challenge. Phakathi kwabashwibi asebeluleme kukhona uLungi Ngidi, Dale Steyn bamaTitans, Vernon Philander kanti sebeqalile ukujima oMorne Morkel noChris Morris.
Lokhu kusho ukuthi amaProteas azoshaya ngoNgidi, Steyn, Philander, Morkel, Morris, Kagiso Rabada, Wayne Parnell noDauine Olivier.
“Yinkinga emnandi lena esizobhekana nayo. Kona kuzoba nzima ukuqoka iqembu labadlali abangu-15. Nokho kungcono ukuba nenkinga yokuba nabadlali abaningi abaphilayo kunokubhekana nenkinga yokulinyalelwa yinqwaba yabadlali,” kusho uZondi.
Phezu kokubuya kwalaba bashwibi abazange babonakale elakuleli libhekene neBangladesh emidlalweni emibili yama-Test. Kuzobuya nensika u-AB de Villiers obhethayo.
“Ngiyazi ukuthi abantu bathi sizoziwinela kalula kwiZimbabwe. Siyazi ngeke kube lula kodwa nathi sifuna ukuwina ngendlela ecacile. Uma sinqobe ngewikhethi eyodwa noma nge-run eyodwa siyodumala. Iqembu lethu ngeke silishintshe. Okumnandi wukuthi abadlali abasebancane nabanamava benza kahle. Abadlali abamnyama abanikwa ithuba nabo bashaya into ecokeme. Bayakhombisa ukuthi basuke bengaqokiwe ngephutha noma ngebala labo kwelesizwe,” kusho uZondi.
Uma elakuleli selibhekene neZimbabwe kubhekwe ukuthi liphathe u-Aiden Markram, Dean Elgar, Hashim Amla, Faf du Plessis, Temba Bavuma, AB de Villiers, Quinton de Kock, Philander, Rabada, Morkel, Maharaj.