UKeet uvikela iWits ngokubheda kohlelo
UNOZINTI weBidvest Wits, uDarren Keet, uyakuphika ukuthi kunokungaboni ngaso linye phakathi kwabadlali abathile nomqeqeshi uGavin Hunt okuyimbangela yokuthi ompetha be-Absa Premiership bahlale ezembeni kusukela isizini iqala kuze kube imanje.
Izinto zimapeketwane kwiClever Boys. Leli qembu siye koshicilela lihlezi endaweni yesibili ukusuka ekugcineni kwilog ye-Absa Premiership.
IWits isiphenduke umtapo wamaphuzu okufakazelwa wukushaywa kwayo imidlalo eyisithupha ngemuva kwengu-10 yeligi.
Isiqunjwe phansi yiCape Town City, Lamontville Golden Arrows, AmaZulu, Bloemfontein Celtic, Chippa United neMamelodi Sundowns. Phezu kwalokho iyona futhi esidedele amagoli amaningi emidlalweni yeligi. Isidedele angu-15. IWits ibalwa namaqembu aseshaye amagoli amancane isabhakuzise inethini ngayisithupha.
Iyona evikela isicoco seligi okubukeka kuzoba ngumqansa ukuthi isibuyise kule sizini ka-2017/2018. Kuyimanje ilinyalelwe ngabadlali abamqoka okubalwa kubona ukaputeni uThulani “Tyson” Hlatshwayo.
UGabadinho Mhango usadonsa isigwebo sokukhwifa ngamathe umdlali woSuthu uMichael Morton noNazeer Allie. KoweSundowns abashaywe kuwona ngo 2-0 ngoLwesibili, u-Elias Pelembe uphuke fahla ingalo. Basanda kubuya ekulimaleni uBuhle Mkhwanazi noXola Mlambo.
“Ngeke ngikuvume ukuthi kukhona ukungezwani eqenjini phakathi kwabadlali nomqeqeshi. Engingakusho ukuthi kulula ukuqhamuka nala mahlebezi uma izinto zivele zingahambi kahle. Sibumbene sonke eqenjini futhi sinabadlali abaningi abanesipiliyoni sokubhekana nezimo ezinzima. Kujwayelekile ukuthi ngemuva kwesizini enhle kungahambi kahle. Ziningi izimbangela zalokhu, njengokuthi amaqembu aqinisa kakhulu uma ezodlala nompetha nokuthi-ke silinyalelwe abadlali abaningi abamqoka,” usho kanje uKeet.
Ngendlela adlale kahle ngayo bekufanele kube uyena oqokwa abe ngumdlali ovelele osukwini kodwa kwagcina kuqokwe uKhama Billiat osuke ebhentshini washayela iSundowns amagoli amabili.
Ephawula ngalokhu uKeet uthe: “Ngenxa yesimo esikusona, anginandaba nokuthi angikhethwanga. Ebengikuzele lapha ngamaphuzu agcwele kodwake ngebhadi asiphunyuka.”