ISundowns ishiywa yisilomo somdlali
SIYASHIYA kwiMamelodi Sundowns isilomo somdlali uKhama Billiat esiphelelwa yinkontileka kuBafana Ba Style ngoJuni.
UBilliat akakayivuseleli inkontileka yakhe kwiSundowns kuze kube yimanje. Umthombo othembekile utshele Isolezwe ukuthi uBilliat ngeke ayivuselele inkontileka yakhe kumaBrazillians.
“Ngeke ayivuselele inkontileka yakhe kwiSundowns uyahamba ekupheleni kwesizini. UKhama ubona ukuthi uzobe ezigwaza ngowakhe uma ethatha isinqumo sokuvuselela inkontileka yakhe neSundowns ngoba ngeke ivume ukumdedela ayofeza iphupho lakhe lokudlala phesheya kwezilwandle ekupheleni kwesizini. Nokho uzoqhubeka adlale kuze kuphele isizini,” kusho umthombo othembekile ngaphambi komdlalo weSundowns neBidvest Wits ngoLwesibili.
UBilliat (27) ufike kwiSundowns ngo-2013 esuka kwi-Ajax Cape Town. KwiSundowns usezinqobe zonke izicoco ezimqoka. Udle ezimbili ze-Absa Premiership, eseTelkom Knockout neseNedbank Cup.
Uphinde wafaka isandla ngesikhathi iSundowns imuka nesicoco seCAF Champions League neseCAF Super Cup. Ngemuva kwalokho uBilliat ufakwe ohlwini lwabadlali abathathu okuqokwe kubona ovelele kwabagijima emaqenjini ase-Afrika.
Ugcine ekhale ngaphansi kuzakwabo uDenis Onyango odlala naye kwiSundowns. UBilliat usemataniswa nenqwaba yamaqembu. Uke wakhonjwa kuLille yaseFrance, Zamalek yaseEgypt namanye amaqembu aseSaudi Arabia. Lapha eNingizimu Afrika ukhonjwa kwiKaizer Chiefs.
“NgoDisemba 2 uKhama uzobe esenawo umqondo wokuthi uyodlala kuphi ngesizini ezayo. Yena usesithathile isinqumo sokuthi akasazimisele ngokudlala kwiSundowns,” kuqhuba umthombo.
Imenenja yakhe, uSiyabulela Loyilane, itshele leli phephandaba ukuthi icela ukungaphawuli ngendaba kaBilliat.
“Ngicela ukungaphawuli kuze kube yisikhathi esithize. Okwamanje usagxile kwiSundowns nasekubuyiseni ifomu yakhe,” kusho uLoyilane ophethe izindaba zalo mdlali.
UBilliat ube yiqhawe ngoLwesibili ebusuku ehlohla amagoli amabili ngesikhathi iSundowns iqumba phansi iBidvest Wits ngo 2-0 emdlalweni we-Absa Premiership, eBidvest Stadium, eMilpark.
Usihlalo weSuperSport utshele Isolezwe ukuthi uyazifela ngoBilliat futhi uyasazi isimo sakhe kwiSundowns.
“Ungomunye wabadlali engizifelayo ngabo. Mina-ke kodwa angenzi njengeSundowns ukuthi ngifune ukungenelela ekubeni umdlali esenenkontileka neqembu. Uma i-agent yakhe ingathi nangu umfana uyathanda ukuzodlala kwiSuperSport singajabula ukuba naye eqenjini,” kusho uSibiya.
Umqeqeshi weSundowns, uPitso Mosimane, uqinisekisile ngesikhathi exoxa nabezindaba ukuthi uBilliat noLeonard Castro bayashiya ekupheleni kwesizini. UCastro uzobe egijima kwiChiefs ngesizini ezayo.