Ujabule uKhuzani ozohlonishwa emcimbini
SIYACHICHIMA yinjabulo isilomo sikamaskandi uKhuzani “Indlamlenze” Mpungose ngokuthi sizohlonishwa emcimbini, Inkundla Yamantungwa ozoba seMoses Mabhida Stadium kusasa ntambama.
UKhuzani uthe lokhu kufakazela ukuthi nguye inkosi yomaskandi. “AmaNtungwa yisibongo esikhulu esisabalele i-Afrika yonke. Bafuna ukungiklomelisa ngoba bayagcizelela ukuthi yimina ophethe. Ngijabule ngoba uma wenza umculo wenzela umphakathi.”
Umhleli womcimbi uNdabe Mbili uthe babone igalelo likaKhuzani emculweni base benquma ukumhlonipha.
Uthe umcimbi uzoqala ngo-12 emini kuze kube wu-12 ebusuku. Phakathi kuka-12 no-6 ntambama kuzongenwa mahhala bese kuthi ngemuva kwalokho kube u-R100.
Abaculi abazobe beshiyelana inkundla kubalwa kubo uThokozani Langa, Mjikijelwa, Khandalenja, Qhoshangokwenzakwakhe, DJ Merlon nabanye.
Khonamanjalo, uKhuzani ugcine esifezile isithembiso sakhe sokunikeza abalandeli bakhe uhhafu wemali ayihlomula emcimbini iKhuphuka Nezakho obuseCurries Fountain muva nje. Umculi owafika nabalandeli abaningi wahlonyuliswa ngoR100 000. “Abalandeli bami basebenza kakhulu ukuze ngibe lapho ngikhona namhlanje. Amandla abo angifuni aphele futhi ngifuna bahlale benomfutho. Uma sihlomula asingabakhohlwa,” kuchaza uKhuzani.
Enye induna yabalandeli uMvumeni Zwane ithe bazoyibeka le mali bayisebenzise emcimbini wokujabula ozoba ngoMashi wonyaka ozayo. Indawo abakayazi.