Ukhuza ibuya kumaCrown uPearl
AZOKWETHULWA nguPearl Modiadie noThabo Mdluli amaSABC Crown Gospel Music Awards azobe eseNkosi Albert Luthuli International Convention Centre (ICC), eThekwini ngeSonto ebusuku.
UPearl ungumethuli wohlelo lwezingxoxo nosaziwayo kwaSABC 1, iZaziwa. Uthula ne-iThe Great Escape ngo-12 kuya ku-3 ntambama phakathi nesonto eno-Amon Mokoena kuMetro FM.
UThabo, ongumculi futhi ongumsakazi wohlelo lwantambama kwiPower FM, kuzobe kungokwesihlanu kulandelana ephethe uhlelo kumaCrown.
UPearl kuthiwa ubuyiswe ngenxa yomsebenzi omuhle awenza ngonyaka odlule.
“Ukuhlanganisa laba bantu abahamba phambili eNingizimu Afrika ngethalente kuzoqinisekisa ukuthi sigcina isithembiso sokusingatha umcimbi oseqophelweni eliphezulu,” kusho oweWorld Gospel Powerhouse, ehlela amaCrown. Umcimbi kuzobe kungoka-10 nonyaka. Okulindeleke ukuthi bethule izindondo uLerato Kganyago, Thabiso Mokhethi, Lesley Musina, Brian Temba, Jessica Nkosi, Brenda Mhlongo, Siya Mhlongo nabanye.
Abaculi abazoshiyelana inkundla nguHlengiwe Mhlaba, Nothando Hlophe, Solly Mahlangu, Neyi Zimu, Sipho Ngwenya, Jumbo, Thinah Zungu, Nduduzo Matse, Dumi Mkokstad nabanye.
Kusasa kuzoqala umbukiso iChristian Expo Afrika lapho kuzobe kukhonjiswa khona ngezinto ezahlukene ezithinta ubuKhrestu. Uzoqala ngo-10 ekuseni kusasa nangeSonto. Kungenwa mahhala.
NgeSonto amaCrown azokwandulelwa wukuthi osaziwayo bahambe kukhaphethi obomvu ngo10 ekuseni ngaphambi kokuthi kuqale umdlalo weshashalazi iMaria ngo-6.
Kusukela ngo-8 azobe esekhonjiswa bukhoma kuSABC 2.
Amathikithi omcimbi atholakala eComputicket ngoR480. AweVIP naweVVIP kuthiwa asedayiswe aphela.