Bashaqekile kubulawa umholi we-ANC
KUNGAKAPHOLI maseko kubulewe obenguSihlalo we-ANC ku-ward 7, esifundeni iMoses Mabhida, sekuphinde kwasocongwa elinye ilungu likaKhongolose, uMnuz Sthembiso Mhlongo (osesithombeni esincane) ohlaselwe ekwakhe eMpophomeni, izolo entathakusa.
UMhlongo (34) obeyiPhini likaNobhala we-ANCYL eMoses Mabhida futhi eyikhansela elimele i-ANC eMkhandlwini uMgungundlovu, udutshulwe ngabantu abangaziwa abamhlasele emzini wakhe womxhaso abazenze amaphoyisa.
Ukubulawa kukaMhlongo kulandele ukubulawa kukaMnuz Lungisani Mnguni (34) obenguSihlalo we-ANC ku-ward 7, eMkhambathini. UMnguni ubulawe ehambisa ukudla esikoleni abethole kuso ithenda yokuphakela izingane ngoMsombuluko.
UMhlongo nguyena owayekhuluma nabezindaba endaweni yesehlakalo lapho kwabulalwa khona uMnguni.
Umakhelwane kaMhlongo ongeke aze adalulwe ngenhloso yokumvikela uthe ubelele ngesikhathi ezwa kuqhuma isibhamu.
“Ngizwe isibhamu siqhuma kabili emva kwalokho ngabe sengizwa umsindo. Ngicabange ukuthi izibhamu lezi ezihlale ziqhuma vele endaweni,” kusho umakhelwane.
Okhulumela i-ANCYL esifundeni iMoses Mabhida, uMnuz Njabulo Mtolo uthe bakhathazekile ngokubulawa kwamalungu ophiko lwentsha esifundeni sabo. Uthe asemane amalungu e-ANCYL asebulewe khona kusukela ngoDisemba nyakenye.
“Okusiphatha kabi kakhulu wukuthi kuzona zonke izigameko zokubulawa kwamalungu ethu akukaboshwa muntu. Sibona ukuthi nezigebengu ziyaqhubeka nokubulala abantu ngoba ziyabona ukuthi azibanjwa,” kusho uMtolo.
Uthe abazi ngempela ukuthi yini imbangela yokubulawa kukaMhlongo ngoba azikho izinxushunxushu ezikhona enhlanganweni.
“UMhlongo ubengakaze asho ukuthi kukhona abantu angezwani nabo noma ngabe kuthiwa bekukhona lokho kungaboni ngasolinye kodwa besingacabangi ukuthi kungaze kufike kulesi sigaba sokubulalana,” kusho uMtolo.
Ikhansela lendawo, uMnuz Mzomuhle Ndlovu lithe basakhungathekile ngokubulawa kukaMhlongo.
NoNdlovu uthe: “Sisadidekile ngempela ukuthi ngabe ubulaweleni uSthe (Mhlongo) ngoba ubengenazitha,” kusho uNdlovu.
Umfowabo kamufi, uMnuz Sipho Mhlongo uthe abafuni ukuqagela ngokubulawa kukamfowabo ngoba lokho kuzokwenza basole izinto ezingekho.
“Sizoyekela amaphoyisa ukuba enze umsebenzi wawo, siyathemba ukuthi azophenya aze agcine ebabambile abenzi bobubi,” kusho uMhlongo. Okhulumela amaphoyisa KwaZulu-Natal, uColonel Thembeka Mbele uthe owesilisa oneminyaka engu-34, ubesemzini wakhe ngesikhathi edutshulwa ngabantu abazenze amaphoyisa. Uthe imbangela yokubulawa kwakhe ibingakaziwa, bekungakaboshwa muntu.
UMhlongo ushiye unkosikazi wakhe uNkk Lungile NxumaloMhlongo nengane eyodwa.