Bakhala ngamaphoyisa abancinze amankwahla efuna izibhamu
BAKHALA ngesihluku samaphoyisa abomndeni wakwaButhelezi eHlobane abathi bataxwe ngemvubu abanye bancizwa amankwahla, amaphoyisa efuna izibhamu.
Lo mndeni usuvule icala lokudicilela phansi isithunzi kulandela ukushaywa ngemvubu kwabane, bancinzwa amankwahla baphinde bamodeliswa benqunu.
Izimoto ebezibhaliwe eziyisikhombisa zeziteshi ezahlukene, kuthiwa bezigcwele igceke. Amaphoyisa acela kwayishumi kuthiwa agasele kulomuzi, amanye engawufakile umfaniswano wamaphoyisa.
UNksz Thenjiwe Buthelezi (28) uthi uvuke ngo-7:30 ekuseni izolo umfowabo uMnuz Sabelo Buthelezi (20) nabangani bakhe abathathu bekhala ekhishini.
“Ngiphume ngiphaphatheka ngiyobheka ukuthi kwenzekani ngafica kugcwele amaphoyisa ekhishini eshaya umfowethu nabangani bakhe ngezimvubu. Ngithe ngiyakhuza angixosha athi angibuyele ekamelweni uma ngingafuni ukuthelwa amachaphazelo. Nginqabile abe esengidudula, ngiphethe ingane enezinyange ezingu-18. Siwe phansi salimala,” kusho uNksz Buthelezi.
Uthe ubuyelile ekamelweni wafonela uyise, uMnuz Maqonqo Buthelezi (59) ukuba abalekelele.
“Ubaba ubese-Vryheid lapho edayisa khona. Ungiyalele ukuba ngifonele omakhelwane. Amaphoyisa angiphuce ucingo ngesikhathi ezwa ukuthi khona engibafonelayo. Athatha umfowethu nabangani bakhe benqunu ahamba nabo,” kusho uNksz Buthelezi.
UButhelezi uthe okumphatha kabi wukuthi amaphoyisa amehlise isithunzi ngokuhlasela izingane zakhe azithatha ngaphandle kwecala.
“Anginqabi ukuthi uma izingane zigangile ziboshwe, okusiphatha kabi yisihluku sokushaywa kwezingane ngezimvubu, zincizwe amankwahla bese zihanjiswa nqunu kubuka abantu. Lokho kwehlisa isithunzi. Nalezo zibhamu abebethi bayazifuna abazange bazithole, alikho icala esithole ukuthi livulelwe umfana wami nabangani bakhe. Ngaphezu kwalokho indodakazi yami nengane yayo balinyaziwe. Sibukelwa phansi ngoba singabantu basemakhaya abangawazi amalungelo abo. Ngeke lokhu bakwenze emadolobheni. Bagasele emzini womuntu bafike bashaye abantu,” kusho uButhelezi.
UNksz Buthelezi uthe uye esiteshini saseHlobane eyovula icala lokushaywa emuva kwesigameko kodwa bafike banqaba bathi ngeke akwazi ukubopha uhulumeni.
Emuva kokuba lo mndeni ukhulume neSolezwe kwathunyelwa nemibuzo kwabakhulumela amaphoyisa, umndeni wakwaButhelezi ubuyelile esiteshini uyovula icala.
Amaphoyisa aseHlobane kuthiwa athe sebezobavulela icala ngoba sebegijime bayobaceba eThekwini.
Okhulumela amaphoyisa KwaZulu-Natal, uCaptain Nqobile Gwala ukuqinisekisile ukuvulwa kwecala.
“Amaphoyisa aseHlobane aphenya icala lokudicilelwa phansi kwesithunzi kulandela ukungena kwamadoda angaziwa azenze amaphoyisa ashaya abantu. Kuyaphenywa akekho osaboshiwe,” kusho uCaptain Gwala.