Basola izikhulu ngokudembesela kwelokunukubeza
INHLANGANO ezimele ephenya ngenkohlakalo isola uMnyango wezeMfundo KwaZuluNatal ngokudembesela odabeni lukathishanhloko wesikole samabanga aphezulu eVerulam osolwa ngokunukubeza umfundi.
ICorruption Watch ithi ayanelisekile ngendlela okusingethwe ngayo udaba oluthinta umfundi wesifazane oneminyaka ewu-16. Umfundi kaGrade 8 kuthiwa uvele uhlukumezekile ngokugada yedwa ikhaya nezingane zakubo ezine. Uphila ngokusizwa wumphakathi nomakhelwane
Okhulumela iCorruption Watch, uNksz Phemelo Khaas, uthe babikelwa wumphakathi ngodaba base beqala olwabo uphenyo.
“Okusiphatha kabi wukuthi asazi ukuthi uphenyo okuthiwa luyenziwa luzothatha isikhathi esingakanani. Siyazi ukuthi uthishanhloko umisiwe, nakho okuthathe isikhathi ukuthi kwenzeke. Umfundi kuze kwadingeka ashintshelwe kwesinye isikole, wasuswa nasemphakathini ngenxa yokungenelela kwethu. Besifuna ukuqinisekisa ukuthi uphephile nomndeni wakhe,” kusho uNksz Khaas.
Kusolwa ukuthi uthishanhloko wathatha umfundi wayomnukubeza kwakhe. Isitatimende esithunyelwe yiCorruptin Watch siveza ukuthi umfundi walubika udaba kusonhlalakahle wesikole, washo nokuthi ngeke esakwazi ukukhululeka esikoleni. Kuthiwa isikole asizange simvikele umfundi futhi asisilalelanga isikhalo sokungakhululeki esikoleni. Kunalokho kuze kwangenelela iCorruption Watch yacindeza osonhlalakahle ukuthi bavikele umfundi. ICorruption Watch ikhala nangokuthi udaba lwanikezwa uthisha wesilisa ukuba alusingathe esikoleni. Ibona kungebona ubulungiswa ngoba umfundi ubengeke akhululeke ukuxoxa naye.
Ngokwesitatimende kuthiwa uthishanhloko wamiswa ngo-Agasti ekubeni icala livulwe ngamaholidi ePhasika, wavela okokuqala eNkantolo yeMantshi eVerulam ngo-Okthoba 18.
“Siphoxekile ngoba zonke izinhlaka ezithintekayo sibona sengathi ziluthatha kancane udaba. Lokhu kusho ukuthi ingane ayikakhululeki futhi isengagileka,” kusho isitatimende.
Okhulumela uMnyango esifundazweni, uMnuz Sihle Mlotshwa, uthe akulona iqiniso ukuthi bayadembesela ekuthatheni izinyathelo. Uthe izinsolo ezithinta ukuhlukunyezwa kwabafundi ngokocansi bazithathela phezulu.
“Njengoba uthishanhloko emisiwe esikoleni kukhomba kona ukuthi silunakile udaba. Kumele silandele yonke imigudu efanele ophenyweni lwethu ngoba udaba lubucayi. Uma uthishanhloko etholwa enecala uyothathelwa izinyathelo ezifanele,” kusho uMlotshwa.