Bafuna kuphenywe ngezinsolo ezibhekiswe kungqongqoshe
UNGQONGQOSHE wezobuNhloli uMnuz Bongani Bongo abamnike thuba ePhalamende njengoba izolo bethe maziphenywe izinsolo zokuthi uzame ukugwazela u-Advocate Ntuthuzelo Varana ohola uphenyo ngokusetshenziswa kombuso yidlanzana.
Kuthiwa uBongo wayegwazela uVarana ukuthi ayeke ukuphenya abasebenzisa umbuso.
NgoLwesine ikomiti elibhekelele amabhizinisi kahulumeni lithe lishaqekile ukuzwa izinsolo ezibekwa uBongo. Lijube uMvikeli woMphakathi u-Adv Busisiwe Mkhwebane nekomiti elibhekelele ukuziphatha kwamalungu ePhalamende ukuba baphenye.
UBongo uthe usalinde izinhlaka ezizophenya ukuba zimnike isitatimende esifungelwe uVarana asinikeza uSomlomo wePhalamende uNksz Baleka Mbete.
UMnuz Brian Dube okhulumela uMnyango wezobuNhloli uthe ngesikhathi kubhalwa lezi zinsolo, ungqongqoshe waziswa ngazo futhi uzosebenzisana nalabo abaphenyayo. “Ungqongqoshe udinga isitatimende esifungelwe esenziwe ngabamsolayo ukuze asifunde. Uzolinda abasePhalamende ukuthi bambize.”
UVanara nguye ophosa imibuzo abantu ababizwa ekomitini eliphenya ngokusetshenziswa kombuso yidlanzana.
Ngeledlule uNgqongqoshe wamaBhizinisi kaHulumeni uNkk Lynne Brown nePhini lakhe uMnuz Ben Martins bakhale ngendlela uVanara ahloma ngayo imibuzo.
Kuleli sonto amalungu ePhalamende athe ayamthemba uVarana, awanankinga nendlela abuza ngayo ofakazi.
USihlalo wekomiti lamabhizinisi kahulumeni uNkk Lungi Mnganga-Gcabashe uthe uzobona ukuthi bazothatha siphi isinqumo ngalolu daba.
Inhlangano esiza umphakathi i-Organisation Undoing Tax Abuse (Outa) ithe okushiwo ngowayenguSihlalo webhodi lakwa-Eskom uMnuz Zola Tsotsi kucacisa ngenkohlakalo ebiyenziwa kule nhlangano ethinta noMengameli Jacob Zuma.
USihlalo we-Outa uMnuz Wayne Duvenage uthe kuyacaca ukuthi inkohlakalo inuka phu kwa-Eskom.
Uthe okwenzeka kwa-Eskom kuyenzeka kwa-SAA, SABC, Prasa naseTransnet.