Kuzovalwa amanzi athunyelwa komasipala abakweletayo
UMNYANGO wezaManzi neNhlanzeko usumemezele ukuthi uzovala amanzi athunyelwa komasipala abawu-30 namhlanje ngenxa yokuthi bawukweleta u-R10.7 billion.
IFree State neNorth West yizona zifundazwe ezinomasipala abaningi abakweletayo njengoba beyisikhombisa kulezi zifundazwe ngasinye.
Kulandela iMpumalanga enomasipala abayisithupha abakweletayo, kube yiLimpopo neNorthern Cape nababili, iKwaZulu-Natal, Eastern Cape naseGauteng babodwa omasipala abakweletayo.
KwaZulu-Natal nguMasipala waseZululand kuphela ozovalelwa amanzi njengoba ukweleta ngaphezu kuka-R56 million (R56 361 000).
UMnuz Sipho Nkosi, oyiMenenja kaMasipala waseZululand, uthe bebengazi ukuthi kunohlu lomasipala abakweleta uMnyango wezaManzi neNhlanzeko olubhadlazwe kwiwebsite yalo mnyango.
Akathandanga ukuphawula ngokuthi bayakweleta noma cha kodwa wathi uzoqala ngokubheka lolu uhlu.
UMnuz Sputnik Ratau, obhekelele ezokuxhumana eMnyanweni wezaManzi neNhlanzeko, uthe bazophoqeleka ukuthi bawavale amanzi komasipala ngoba kudala bencengwa ukuthi bakhokhe kodwa bangalethi lutho.
“Umthetho uthi omasipala kufanele basikhokhele kungakadluli izinsuku eziwu-60 kodwa sezishaye zadlula izinsuku eziwu-60 singayitholi imali yethu kulabo masipala. Siqale saxoxa nabo eminyakeni emibili edlule kodwa baziba,” kusho uRatau.
Uthe udaba baze baludlulisela enkantolo bathola amasamanisi awu-59 anikezwe omasipala abawu-121 akade bexhume amanzi ngokungemthetho.
“Phezu kwayo yonke le mizamo izikweletu zomasipala zilokhu zinyuka. Yingakho sesisebenzisa isigaba 59(3)(b) somthetho wezaManzi esigunyaza ukuthi siwavale amanzi komasipala abasikweletayo. Ngumzamo wethu wokugcina wokuthi bakhokhe lona emuva kokuzama ukuxoxisana nabo,” kusho uRatau.
Uthe uma omasipala bengakhokhi uMnyango awukwazi ukulethela abantu amanzi, ukwakha amadamu amasha nokuthuthukisa ingqalasizinda ephaka amanzi.
Uphethe ngokuthi bayaxoxa noMnyango weziMali ukuthi ungabaxhasi omasipala abangazikhokhi izikweletu zabo zamanzi.
EGauteng nguMasipala waseMfuleni ozovalelwa amanzi njengoba kuyiwona wodwa okweletayo.
ELimpopo ngomasipala ababili abazovalelwa amanzi okuyiMopani neVhembe, eMpumalanga yiMbombela, Dipaleseng, Lekwa, Msukaligwwa, eMalahleni, Dr Pixley kaSeme.
E-Eastern Cape yi-Amathole, eNorth West yiMadibeng, JB Marks, Dr Ruth Segomotsi Mompati, Maquassi Hills, Mahikeng, Ditsobotla neNgaka Modiri, eNothern Cape yiDikgatlong neNama Khoi.
Omasipala abazovalelwa amanzi eFree State yiNgwathe, Mafube, Maluti a Phofung, Matjhabeng, Nala, Mangaung neKopanong.