Abeneme ngokunyuswa kwemali yothisha bakwaGrade R
IZINYUNYANA zothisha KwaZuluNatal kazeneme ngokunyuselwa imali kancane kothisha bakwaGrade R abangenazo iziqu ngo-R750 bese labo abaneziqu banyuselwe ngo-R1 250.
Amalungu ezinyunyana athe bafuna othisha bakhokhelwe u-R10 000 ngenyanga ngenxa yokuthi benza umsebenzi obalulekile esizweni.
UMnuz Allen Thompson, iPhini likamengameli weNatu, uthe nakuba bengeneme kodwa bazoqhubeka babhunge nomnyango ngokuthi iphinde inyuswe.
Uthe umnyango kumele uqinisekise ukuthi ukhokha le mali ngoDisemba ukuze othisha babe noKhisimusi omuhle.
“Othisha bahola u-R6 500 ngenyanga ngakho isencane imali abanyuselwa ngayo. Kodwa-ke kumele bakhokhelwe yona le mali sibe siqhubeka nokubalwela ngoba sifuna baqashwe ngokugcwele, bathole yonke eminye imihlomulo njengabanye othisha abaqashwe ngumnyango,” kusho uThompson.
Uthe othisha akumele bakhokhelwe ngokuhlukana ngoba benza umsebenzi ofanayo.
“Sifuna le mali abazoyithola ikhokhwe kusuka ngo-Ephreli nonyaka. Umnyango uthembisile ukuthi uzobakhokhela ingakapheli inyanga ezayo. Asethembe lokho kuzokwenzeka ngoba umnyango awubakhokheli abenza imisebenzi nawo ngesikhathi,” kusho uThompson.
UNksz Nomarashiya Caluza, unobhala weSadtu, uthe nyakenye babeshilo ukuthi bazoqhubeka nezingxoxo nomnyango mayelana nokunyuselwa imali kothisha.
Uthe kabaneme ngokuthi imali ayikafinyeleli ku-R10 000 kodwa bazoqhubeka baxoxe nomnyango.
“Izingxoxo ziyaqhubeka ngoba sifuna nabo bahole imali engcono. Ayanele imali abayiholayo kodwa sizobalwela baze bathole okungcono,” kusho uNksz Caluza.
Okhulumela umnyango wezemfundo, uMnuz Sihle Mlotshwa, uthe bahlale behlangana nezinyunyana emkhandlwini wezingxoxo lapho bebhunga ngezindlela zokuthuthukisa izimo zokusebenza zothisha.