Ngabe uMnangagwa uzowuletha umehluko?
INJABULO ekhonjiswe ngabantu baseZimbabwe emuva kokusula esikhundleni kukaMnuz Robert Mugabe ngeke iqhathaniswe nalutho futhi abantu babonakala benethemba lokuthi impilo izoqala kabusha.
Ibamba likamengameli omusha waseZimbabwe, uMnuz Emmerson Mnangagwa uthathwa njengomuntu oyithemba leZimbabwe, ozoletha uguquko kwezomnotho njengoba esho konke abantu abathanda ukukuzwa ngekusasa lezwe labo.
Uthe sekuyisikhathi sokuthi kuqedwe inkohlakalo futhi ubonakala engumuntu ongenza noma yini ukubuyisa abatshalizimali nezinhlangano eziboleka amazwe omhlaba imali.
Uyisithandwa sosomabhizinisi ngenxa yezinto azishoyo.
Kodwa umbuzo omkhulu uthi ngabe uMnangagwa (75) obeyisithenjwa sikaMugabe uzokwazi yini ukuza noshintsho eZimbabwe?
Yize kumnandi manje kodwa nezilonda zakudala zisekhona futhi izehlakalo zakudala azizinhle neze.
UMnangagwa ngeke alibalekele iqiniso lokuthi wayenesikhundla esiphezulu kuhulumeni wengcindezelo obuphethwe nguMugabe.
Okuthusayo wukuthi wayenguNgqongqoshe wezokuPhepha kwezwe kusukela iZimbabwe ithola inkululeko ngo1980 kuze kube ngu-1988.
Wayephethe uphiko lwezobunhloli olwalusatshwa futhi olwabulala inqwaba yamaNdebele ngo-1980 eMatebeleland. Lokho kuqukethwe embikweni iGakurahundi in Zimbabwe: Disturbances in Matebeleland and the Midlands 1980 - 1988.
Umbiko wethulwa yiCatholic Commission for Justice and Peace in Zimbabwe neLegal Resources Foundation.
Lo mbiko ohlasimulisa umzimba ukhuluma ngamaNdebele ayephathiswa okwabantu abavukela umbuso okufanele kulwiwe nabo.
Umbiko ukhombisa ukuthi uphiko lwezobunhloli lwalusebenzisana nethimba elibizwa ngeFive Brigade olwaluseNingizimu yeMatebeleland.
IFive Brigade yayinamasosha aqeqeshwe eNorth Korea ayehlupha abantu futhi yayitshalwe eMatebeleland ukuze iqede abavukela umbuso. IFive Brigade yayibika kumengameli Mugabe hhayi ezikhulwini zamasosha.
Izinkulumo zeFive Brigade ngo-1984 zazithinta izinhlelo zikahulumeni zokulambisa amaNdebele aze afe.
Kwakuthiwa ukudla makungathunyelwa eNingizimu yeMatebeleland ngo-1984. Ngaleso sikhathi amaNdebele ayesevele elanjiswe yisomiso seminyaka emithathu.
Kwakungavumelekile nokuthi abantu bathunyelelwe ukudla yizinhlangano ezizimele njengoba iFive Brigade yayivimba kwasani idabula namasaka empuphu.
Umbiko uveza ukuthi ngo-1984 iFive Brigade yethula umkhankaso wokushaya nokubopha abantu eMatebeleland.
Kuvela nokuthi uphiko lwezobuNhloli lwaluphenya abantu eBhalangwe naseSun Yet Sen lapho babeshokhwa khona ngogesi emhlane, ezindlebeni nasemlonyeni. Babefakwa emanzini, besikwa izitho zangasese, kudlwengulwa abesifazane abanye benwetshwa imizimba baze bafe.
Umbiko uveza ukuthi abantu babehlushwa yiFive Brigade nophiko lwezobuNhloli kanti ngo-1984 kwaboshwa abantu ababehlubuke kwiZIPRA nakwiZanu okwakukhona amadoda, abesifazane nezingane. Baboshwa bahlukunyezwa.
Yinqwaba yabantu eyabulawa, iningi labo ababengamalungu omphakathi angazi lutho ngempi.
Ngesikhathi ekhuluma noNdunankulu waseBritain omusha, uNkk Theresa May ekuqaleni konyaka, uMnangagwa wazikhipha ezehlakalweni zeGukurahundi ethi lokhu kwakwenziwa ngamasosha ehlangene neFive Brigade.
Noma ngabe kwakungamasosha ayebulala abantu kodwa uphiko lwezobuNhloli lwaluzokwazi konke okwenzekayo ngoba lubhekele inhlalakahle yezwe.
Akekho umuntu owajeziswa ngokuhlukunyezwa nokubulawa kwabantu baseMatebeleland.
Kwaphinde kwabulawa abantu ngo-1990 kuya ku-2000.
Umbiko wenhlangano yezizwe wango-2004 usola uMnangagwa ngokuxhaphaza amadayimane namanye amagugu ambiwayo ngesikhathi amasosha aseZimbabwe eyolekelela abantu baseDemocratic Republic of Congo.
Ngo-2005 uhulumeni watshala amasosha namaphoyisa ayodiliza izindlu zabantu abampofu abaseka iMDC ngaphansi kohlelo olubizwa nge-Operation Murambatsvina.
UMnangagwa wayeseduze kukaMugabe nge-Operation Murambatsvina, kudliwa amapulazi nangesikhathi kunezinsolo zokuthi iZanu-PF isebenzise amaqhinga okhethweni luka-2008.
UMnangagwa wayelokhu ethembekile kuMugabe ngendlela yokuthi ngesikhathi abantu bangakubo bengamvoteli okhethweni luka-2000 noluka2005, uMugabe wamphendlela isikhundla ePhalamende yize ayengakhethwanga.
Kuthiwa uMnangagwa owahola umkhankaso wokhetho lukaMugabe ngo-2008 waze weza neqhinga lokuthi uMugabe asebenzisane neMDC ukubusa iZimbabwe.
Kuthiwa esenguNgqongqoshe wezokuVikela ngo-2009 kuya ku-2013, wayethulisa amaqembu aphikisayo nezinhlangano ezisebenzela umphakathi.
UMugabe waqoka uMnangagwa njengePhini lakhe ngo-2014.
Lokhu kwenza uzibuze ukuthi ngabe luzoba khona yini ushintsho eZimbabwe ebuholini bukaMnangagwa noma kuzohlaselwa abamaqembu aphikisayo nabezindaba?
Ukuphakama kukaMnangagwa kubonakala kuzoqhubeka nokuphakamisa iZanu-PF. Kuzocaca ngokuhamba kwesikhathi ukuthi uMnangagwa uza nentando yabantu yini njengoba umlando wakhe ufikisela amahloni.