Kuyanda ukwebiwa kwezimoto kuleli
KUYANDA ukwebiwa kwezimoto ngezimpelasonto, okuvela nokuthi kudla lubi phakathi kukaNovemba noJanuwari.
Lokhu kuvele embikweni wocwaningo lwenkampani iCar Tracker South Africa (SA), efaka imishini yokucupha izimoto nokulandela umkhondo ukuze zitholakale uma zebiwe.
Lo mbiko uxwayisa abanikazi bezimoto ukuthi njengoba sekuqale isikhathi samaholidi, kulindeleke zenyuke izibalo zokwebiwa kwezimoto.
UMnuz Andre Ittman oyisikhulu esiphezulu kwaCar Tracker SA, uthe iyakhathaza indlela izimoto ezebiwa ngayo kuleli. Uthe abantu kumele baxwayiswe ngemikhuba emisha yokwebiwa kwezimoto, ukuze bangazitholi begileka.
“Indlela esetshenziswa ukweba izimoto, iyashintsha zikhathi zonke. Izibalo zikhombisa ukuthi zebiwa ngokufanayo izimoto ezincane zabantu nezezinkampani. Sikhethe ukuthi sikhiphe lo mbiko ukuze abantu bazi ukuthi yini okumele bayixwaye ukugwema ukwebiwa kwezimoto,” kuchaza u-Ittman.
Uthe ukwanda kokwebiwa kwezimoto ngezimpelasonto kwenziwa ukuthi abantu basuke bebaningi ezindaweni zomphakathi.
U-Ittman uthe yize kumele abantu bahlale beqaphile, kufanele baqikelele kakhulu ngezimpelasonto.
Kuvela ukuthi zenyuka ngo13% izibalo zokwebiwa kwezimoto phakathi kukaNovemba noJanuwari ngenxa yokuthi kusuke kufuneka zicwiywe, kusetshenziswe izinsimbi zazo kwezinye.
Ngokwezibalo zezifundazwe kuvele ukuthi iGauteng ihamba phambili ngo-64.65%, u-Ittman athe lokhu akumangazi ngoba yisifundazwe esikhulu.
Kulandela iKwaZulu-Natal ngo14.39%, iMpumalanga ngo-5.20%, Limpopo ngo-3.85%, Eastern Cape ngo-3.51%. Kwezinye izifundazweni kumi kanje: Western Cape 4.99%, Free State 1.35%, Northern Cape 0.40% neNorth West ewu-1.66%.
Ehlaziya izibalo u-Ittman uthe ukwebiwa kwezimoto KwaZuluNatal kwande enkabeni yeTheku, eWestville nasePinetown.
“Akusho nokho ukuthi lezi zibalo ziyohlala zinje ngoba nemikhuba nezindlela zokwebiwa kwezimoto ziyashintsha. Kubalulekile ukuthi abantu bahlale beqaphile njalo. Kumele izindlela zakho zosuku uzihlelele ngokuthi imoto yakho izobe iphephe kangakanani. Qinisekisa nokuthi uyazazi izindlela zokuthola usizo endaweni okuyo,” kusho u-Ittman.