I-Mega City esinwetshiwe isizoba wudukemini
KUZOVULA amanye amathuba omsebenzi ukunwetshwa kwenxanxathela yezitolo yaseMlaza, iMega City.
Izolo bekwethulwa kabusha le nxanxathela yezitolo esinezezelwe ngezinye izitolo eziyisikhombisa.
Imenenja yakhona, uNkk Phumi Khuzwayo, ithe kusetshenziswe imali engu-R370 million ukuyinweba.
“Bekungelula ngoba siqale ukwakha sizitshela ukuthi ngo-2016 sizobe sesiqedile kodwa kwangenzeka ngenxa yezinye izinkinga zoxhaso lwezimali,” kuchaza uNkk Khuzwayo.
Uthe basebenzisane nenkampani efaka imali ekwakhiweni kwezinxanxathela zezitolo, iSizivana noMasipala weTheku.
IMeya yeTheku uNkk Zandile Gumede ithe baqale ukusebenzisana neSizivana kusukela ngo-2014.
“Le nkampani ngesikhathi iqala ukusebenza nomasipala kwaba nesivumelwano sokuthi abaqale bafake imali emalokishini ukuze umasipala ukwazi ukusebenzisana nabo ngoba umasipala ungowabantu,” kusho uNkk Gumede.
Uthe uyethemba ukuthi umphakathi waseMlaza uzoyinakekela le nxanxathela yezitolo njengoba ngonyaka ozayo ngo-Ephreli ezobuya ezobheka isimo sezitolo ezintsha.
Omunye wabanikazi beSizivana, uMnuz Andre Williams uthe ukubambezeleka kokuphela kokwakhiwa kwezitolo ebezengezwa kudalwe ukungakhokhi ngesikhathi kukamasipala ingxenye yemali obekufanele uyikhokhe.
“Ngithanda ukubonga uMasipala weTheku ngokusebenzisana nathi ngokuthi kwakhiwe lezi zitolo. Nami ngizosuka kwami eDurban North ngizothenga lapha ukuze ngizozijabulise ngomsebenzi wami,” kusho uWilliams emamatheka.
Uthe unethemba lokuthi le nxanxathela yezitolo izosiza ukuthi ikhulise umnotho wezwe.