Ingqungquthela i-TOC iza e-Afrika okokuqala
IZOHLANGANISA abasemkhakheni wamachweba iTerminal Operators Conference Africa (TOC) ezoba seThekwini ngoDisemba 5 iphele ngoDisemba 6.
Kungokokuqala ngqa ingqungquthela iza e-Afrika kwazise ivamise ukuba semazweni ase-Europe.
Ingqungquthela ihlanganisa izazi kwezokuthuthwa kwempahla, abatshalizimali, abanikazi bemikhumbi, abamaloli, abakha imishini ethutha impahla emachwebeni nabanye.
UNgqongqoshe wezokuThuthukiswa koMnotho, ezokuVakasha neMvelo KwaZulu-Natal, uMnuz Sihle Zikalala, uthe ingqungquthela izothuthukisa umnotho wesifundazwe futhi ikhombisa ngokusobala ukuthi isifundazwe sikulungele ukubheka amathuba omnotho olwandle.
“Ingqungquthela izoba seNkosi Albert Luthuli International Convention Centre. Ikhombisa ukuthi i-Afrika isikulungele ukuvelela. Kuhle ukuthi ingqungquthela iKwaZulu-Natal ngoba sinamachweba amabili eliseThekwini neliseRichards Bay.”
Uthe iTOC izokhombisa abantu bomhlaba ukuthi iKwaZulu-Natal inamathuba amaningi kwezamachweba futhi iyona eyindlela yokungena kwamanye amazwe aseAfrika.
“Ichweba laseThekwini liyindlela yokungenela kwamanye amazwe ase-Afrika ngoba iNingizimu Afrika inobudlelwano namanye amazwe. Sinengqalasizinda esezingeni eliphezulu ehlanganisa isikhumulo samabhanoyi iKing Shaka International enendawo yokuhambisa izimpahla kwamanye amazwe esayakha ngo-R74 billion.”
Kuzobe kukhona nosomabhizinisi beDurban Chamber of Commerce and Industry ngoba isimemezelo sokuthi ingqungquthela iza eThekwini sadluliselwa kumalungu ayo.
Echaza ngengqungquthela uNkk Dumile Cele, oyisikhulu esiphezulu seDurban Chamber, wathi izohlanganisa abantu bamazwekazi ase-Afrika nabakwamanye amazwe futhi izongenisa imali eThekwini.
Uthe bayajabula ukuthi iTheku liyaqhubeka nokuheha izingqungquthela ezinkulu okusho ukuthi lihamba phambili ekuzihleleni.