Uxwayisa ngomkhuba wokulova kwezingane
INGANE ejwayele ukulova enkulisa nasesikoleni ifike yenze okufanayo. Lokhu kushiwo uNksz Thoko Zuma onguthisha waseLethusizo Creche, KwaNgcolosi ngesikhathi kunomcimbi wodado basezinkulisa asebelungele ukuyofunda uGrade R, ePinetown, izolo.
Uthe kunabazali abaye bazilovise izingane uma lina noma kumakhaza bengazi ukuthi lokho kuzoba nomthelela omubi noma sezifunda esikoleni.
“Kubukeka kuyinto encane lokhu kodwa kwenza umonakalo enganeni ngoba ikhula yazi ukuthi izolova uma isimo sezulu sisibi ekubeni esikoleni kuzomele iye zonke izinsuku zokufunda,” kusho uNksz Zuma.
UNksz Zuma Fakazi obhekele izinkulisa eMnyangweni wezeMfundo esifundeni sasePinetown uthe izinkulisa zisebenza ngaphansi kohlaka, iNational Curriculum Framework (NCF), oluhlelelwe ingane ezelwe kuya kweneminyaka emine. “Njengamanje izinkulisa azisafani nakuqala lapho umama noma ngubani onothando lwezingane ebeqoqa izingane azigade. Kumele izingane zifunde ngokudlala ngokucula, ngokwenza iminyakazo ethile, inhlanzeko nokwehlukanisa imibala. Lokhu kwenzelwa ukuthi ingane uma isikwaGrade R kube lula kuyo ukuthi ifunde ngoba nakhona kuneCurriculum yakhona,”kusho uNksz Fakazi.
UNkk Sindi Louvie ongusonhlalakahle esifundeni sasePinetown, uthe uhlelo lokulungiselela izingane ukuthi zifunde i-Early Childhood Development (ECD), lunciphisa izinkinga zezingane ezize zifike esikoleni zingenazo izitifiketi, lusize nasezinganeni ezinezinkinga kwezempilo zisheshe zibonwe. “Imidlalo yasenkulisa isisiza ekutheni sisheshe sibone ukuthi ingane ethize ayikwazi ukudlala emidlalo ethize. Uma sesikubonile lokho siyithumele ezikhungweni ezifanele kusenesikhathi, kusheshe kubonwe ukuthi lokhu kudalwa yini bese kulandelwa uhlelo olufanele,” kusho uNkk Louvie