Enye incwadi yombhali onohlonze
UKUHLULWA wukudlala ibhola esakhula kumenze wachitha isizungu ngokufunda umbhali wezincwadi, enye yazo esifundwa ezikoleni.
UMnuz Dumisani Hlatshwayo (37) waseSoweto, eGoli, usanda kukhipha incwadi ethi Imibala Yothando ekhuluma ngezinselelo ezibhekene nezingane ezikhula esikhathini samanje. Le ncwadi, okungeyesibili kwazibhalile, ikhuluma ngentombazane enguSnenhlanhla ezalwa wumculi kamaskandi odumile eyoqala esikoleni esisha. Ishelwa ngumfana obizwa ngeskhothane (uswenka) esikoleni okuthi uma ingafuni ukumqoma bese entshontsha izithombe zakhe azisabalalise ezinkundleni zokuxhumana.
UHlatshwayo, obuye wafunda ezikoleni zaseLimpopo, uthe wayefisa ukuba yiChartered Accountant kodwa wahluleka ngenxa yokuswela imali. Ugcine enza iFinancial Management wangayiqeda wenza neMarketing Management e-Unisa.
“Ngisakhula umdlalo obudlalwa elokishini bekuyibhola lezinyawo. Ngazama ngancama ukudlala ibhola ngagcina ngizihlalela endlini. Umama ubebuya nezincwadi eziningi esikoleni ngichithe ngazo isizungu. Lokhu kungisizile ngoba nasesikoleni othisha babencoma indlela engibhala kahle ngayo izindatshana lwakhula kanjalo nothando lokufunda izincwadi,” kusho uHlatshwayo.
Uthe waqala ukubhala engenele umncintiswano wababhali obizwa ngeMaskew Miller Longman ngo2009. Kulo mncintiswano bekufuneka indaba emfishane, uHlatshwayo wathatha kwayibhala esaneminyaka engu-15 esikoleni bayithanda emncintiswaneni. Lokhu kuholele ekutheni ngo-2013 abhale incwadi yokuqala ethi Inhlonipho efundwa kwaGrade 9 ezikoleni. Imibala Yothando iphume nonyaka kanti nayo uthi ufisa ukuthi ifundwe ezikoleni ngoba ikhuluma ngqo nezingane.
“Ngike ngahlala eduze kwalapho bekunesikole khona ngazinika isikhathi ngixoxa nabafundi ngezinkinga zabo. Baveze ukuthi izinkundla zokuxhumana ziyinselelo kubona ngoba zibuye zibahlukumeze. Bakhale nangokuhlukunyezwa ngabafana ababashela ngezinto abanazo eziwubukhazikhazi. Yilokhu okwenze ngabhala le ncwadi,” kusho uHlatshwayo.
Uthe useke wamenywa eyoxoxa nabafundi ngencwadi yakhe bakhombisa ukuyithanda kakhulu. Usezinhlelweni zokuthi ayihumushe nangesiNgisi ukuze zonke izingane zikwazi ukuyifunda. Ufisa nokuthi ayiphendule umdlalo womsakazo.
UHlatshwayo uyiCopy Writer ezimele kodwa ugxile nasekubhaleni izindatshana nezinkondlo. Izincwadi zakhe ziyatholakala ezitolo kwa-Exclusive Books. Uke wabhala umdlalo womoya othi Singcwaba Nini obudlala kuKhozi FM ngonyaka odlule.