Yimuphi umhlaba esiwulwelayo?
MHLELI: Luyangikhathaza udaba lomhlaba olubonakala luyinzukazikeyi kwabamnyama ngenxa yamankentshane asephenduke izinswelaboya ezizinothisa ngawo.
Sekucacile ukuthi abaningi abamnyama abasiboni isihibe abawela kuso emva kokukhohliswa yizimpisi eziza kubona zigqoke isikhumba sezimvu zizobakhohlisa ngemali. Abantu bangena kulesi sihibe ngenxa yokuthi basuke behleli emhlabeni ovundile ngaphezulu, belima, betshala kanti ngaphansi kusuke kunohlobo oluthile lomnotho olufana nelahle nokunye.
Uma esefikile amankentshane awakhulumi ukuthi lababantu abaficwe emhlabeni ovundile ukuthi bazuze ngokugcwele ngawo. Bakhohlisa amakhosi bawawake ngemali bese abantu besuswa ngayo imali engatheni badudulelwe endaweni abangakwazi ukuphila kuyona njengoba kwakwenza uhulumeni wabamhlophe ngezikhathi zobandlululo.
Yimuphi umhlaba esiwulwelayo? Abamhlophe baveza umhlaba sengathi yinto yokutshala ekubeni maningi amankentshane azuza kakhuku ngaphansi komhlaba ngezimbiwa phansi thina abamnyama esingazuzi lutho ngazo.
Namanje abamnyama basalutheka kalula. Kuyakhathaza ukubona uhulumeni osemandleni ekhohlisana nabantu ngendaba yabantu abathile abatshontsha imali yabakhokhi bentela abakha imizi yabo kodwa kube kukhona abantu abayizimbungulu abadla imali yethu ngezimbiwa phansi benze izigidigidi usuku nosuku sibe thina silambile.
Ngabe uhlelo lokunxeshezelwa luqondile yini noma kuwakwa abantu? Asingabi yizimpumputhe ekubeni sibona. Lo hulumeni uyakhombisa ukuthi ungumdayisi ohlekisa ngokuhlupheka kwethu ekubeni novo lwabantukazana engeke alulalele.