UKomphela uvule isifuba ngoKhuzwayo
UMQEQESHI weKaizer Chiefs, uSteve “Mphathi” Komphela, uvule isifuba okokuqala ngonozinti weqembu uBrilliant “BK” Khuzwayo olizwa ngendaba ijezi kuMakhosi.
Inkontileka kaKhuzwayo naMakhosi iyaphela ngoJuni. Kuvela ukuthi ugaqelwe yiCape Town City ne-Orlando Pirates. Imenenja yakhe uTim Sukazi isanda kuthi iChiefs ilwela ukuthi avuselele ngaphambi kokuthi kuphele uDisemba.
UKhuzwayo usehluleke isikhathi eside ukuhlwitha ijezi ku-Itumeleng Khune abaningi abathi usezingeni lakhe yedwa eNingizimu Afrika. Ujoyine Amakhosi ngo-2012 esuka kwiThanda Royal Zulu eyayikade imboleke kuMaZulu.
Ezinyangeni ezedlule kuvele ukuthi uKhuzwayo ufuna ukushiya kwiChiefs ngenxa yokungalitholi ijezi.
“UBrilliant ungunozinti oseqophelweni eliphezulu, futhi useyingxenye yeqembu. Kunezinkulumo eziningi ezisatshalaliswayo. Uma ngikhuluma iqiniso kwenzeka into efanayo ngoTight (Joseph Moloangane). Akukho okuhlukile futhi ngoBrilliant. Kodwa njengomqeqeshi osebenzela iqembu elikhulu kumele ungaphazamiseki. Usenathi futhi uyajima neqembu.
“Uzodlala noma yinini. Uma kwenzeka noma yini kuKhune siyazi uBrilliant uyilungele inselelo. Phezu kwakhe kusekhona uBvuma (Bruce). Abantu bazohlale bezama ukuqhamuka nalezi zinto (ezingekho). Mayelana nokuthi ziyiqiniso noma ziyakhiwa yini okanye ziqhamuka kumuntu ongaphandle...ukube zishiwo nguDonald Trump (umengameli wase-USA) ngabe ngithi yizindaba zokudlala kodwa kumele ngizamukele njengoba zinjalo,” kusho uKomphela.
Baningi onozinti asebeshiye kwiChiefs eminyakeni edlule bebalekiswa yibhentshi ngenxa kaKhune. Kubona kukhona uReyaard Pieterse osekwiSuperSport United. UMoeneeb Josephs weBidvest Wits ugcine ememezele ukuthi akasayingeni eyokuvimbela iBafana Bafana ngoba kuvinjiswa uKhune. UKomphela umvikele uKhuzwayo ngokubhala ezinkundleni zokuxhumana ezwakalisa ukungenami.
“Awukwazi ukuphikisa yonke imibono yabantu. Kwesinye isikhathi abantu basho izinto bebuswa yintukuthelo. Uma ufuna ukubaphikisa kusho ukuthi awuqinile ukhakhayi. Ukuze uvikele isithunzi sakho kumele ubhekane nezivivinyo uhloniphe zonke izinhlangothi,” kusho uKomphela.
I-Chiefs izobhekana neFree State Stars emdlalweni we-Absa Premiership eMoses Mabhida Stadium, eThekwini, kusasa ngo-6 ntambama.
“Kuzoba wumdlalo onzima futhi ngifisa lingani izulu ngoba njalo uma sidlala nabo liyayithela. Siyazazi izifiso zabo. Iyabonakala into azama ukuyenza umqeqeshi wabo. Sifuna iwini yokuqala ekhaya. Kufanele siwine ukuze sivale igebe namaqembu aphezulu,” kusho uKomphela.