I-Audi ishubisa umbango
KWA-AUDI eNingizimu Afrika bashubisile ezigabeni abaqhudelana kuzo nezimbangi zabo zaseJalimane ngokukhipha izimoto ezintathu, iTTRS, RS3 Sportback neRS5.
Lezi zimoto zakhiwe ukuqeda ubuthongo nenjabulo kubathandi bama-AMG (Mercedes) ne-M (BMW).
Zontathu lezi zimoto zakwa-Audi RS zakhiwe zehluka kunezinye esigabeni sazo ukwenzela khona ukuthi ungadideki uma ziqhamuka futhi zakhiwe ukuthusa noma yini ecabanga ukuthi ingabambana nazo emgwaqeni. RS5 I-RS5 uyibona imile ukuthi yakhelwe ijubane nokususa uchuku njengoba ine-Single frame grille epholishiwe, izikhala zokufaka umoya wenjini ezinkulu ngezansi kwegrille. Amathoshi e-Matrix LED afika nayo bese kuthi ama-indicator ngawe-dynamic indicators.
Ama-RS5 anezicabha ezimbili kuphela okwamanje (Coupe) lokhu okwenza ukhakhayi lwehle kakhulu ngemumva okuyinika isitayela. Lokhu kuhambisana nokuvuleka kwama “hips” okufana nezimoto zomjaho ze-Quattro.
La ma “hips” agcwele amathayi angu-20 inch afika nayo i-RS5. Ngemumva ubona ngamapayipi amabili amakhulu emaceleni akhombisa ukuthi le ayidlali nezingane, bese kuba khona ne diffuser, i-spoiler namathoshi e-LED. Imibala ye-Metallic miningi abathengi abakhetha kuyona futhi yonke yakhelwe ukudonsa amehlo.
Ingaphakathi lama-Audi liyaziwa ngesakhiwo esiphambili futhi esidla umhlanganiso uma uqhathanisa neBMW ikakhulukazi iMercedes.
I RS5 ayiwuphoxi lowo mlando njengoba inezihlalo ze-RS zesikhumba esisezingeni eliphezulu (Nappa leather) esihlotshiswe ngombala ohlukile (RS diamond stitching).
Isiteringi sifana nesemoto yomjaho ngoba siqondile ngezansi sibuye sibe nombhalo we-RS bese kuthi uma uvula isicabha kukhanye negama le-RS elibhalwe esicabheni.
Uma usuhleli ngaphakathi kwi-RS5 amehlo akhangwa i-Virtual Cockpit ekhombisa ijubane nokunye. Ihambisana ne-MMI Infotainment system elawula umsakazo we-Bang and Olufsen uma uthanda.
Abakwa-Audi baphendule izikhalo zalabo ababethi ukuze uthole okuthandayo kumele ukhokhe ngaphezulu.
Le mpendulo isekutheni i-RS5 ifika nokuningi okwenza umthengi angadingi ukufaka ngaphezulu. Uma uqhathanisa ne-M4 kuyabonakala angiphathi ke uma usubheka kwi-C63s, uvele ubone ukuthi i-RS5 iphelele. RS3 Sportback I-RS3 Sportback ifike noshintsho obelusanda kwethulwa kwamanye amaA3. Sibala i-Singleframe grille enyuke ukuvuleka, amalambu e-LED no-bumper abasha abanama-blades ahlukile futhi ayinika amandla.
I-RS3 Sportback inezicabha ezinhlanu (ezine emaceleni nesangemumva sezimpahla). Ifika namathayi angu19 inch (u-18 inch uyatholakala ungafakanga mali). Ngemumva uthola i-spoiler se RS ne-diffuser ephakathi “kwezindishi” zamapayipi amabili.
Ngaphakathi ihlala abantu abahlanu bese iba nezihlalo ze-RS, isiteringi esakhiwe okomjaho negiya elinobucwebe labhalwa u-RS kulona. Ifika ne-Virtual Cockpit eneMMI Infotainment efika ne-Navigation okwazi ukuyibona ngisho kwi speedometer. Izihlalo zifika zigoqwe ngesikhumba se-Nappa. Izihlalo zangemuva ziyakwazi ukulala ukwandisa indawo yokufaka izimpahla. Iqhutshwa ekhasini 6