Iyahlolisiswa i-cylinder head emva kokushaya i-gasket
akukho yini lapho ivaveke khona.
Uma sinomfantu, ikakhulukazi esakhiwe ngensimbi eyi-aluminum sishiseleka kalula kodwa kungcono ukuthola esinye esingena mfantu. Kubalulekile ukubheka nama-valve ukuthi asaphile saka yini.
Uma usuqedile ukusihlola sasikwa saqonda sathi thwi, usungasibuyisela emotweni.
Uma kuwukuthi sesasikwa saphela kuyaphoqa ukuthi uthole esinye.
Abanye onjiniya sebefaka nento ebizwa nge lifter ewucwephe olwakha ugqinsi. Ezinye izimoto zibiliswa ukuba seceleni kwe timming.
Iseluleko sama-hazard sithi qaphela izinga lokushisa emotweni yakho ngaso sonke isikhathi. Uma ubona uthi lusondela endaweni ebomvu kuyobe seyishisa ngaphezu kuka 90 lokho okusho ukuthi isisondele ekubileni.
Uma ike yabila yilinde iphole ngaphambi kokuyithela amanzi ngoba uma uyithela amanzi isashisa kakhulu ingase iwakhafule bese idala umonakalo omkhulu kwicylinder head.
Zicabange wena uma uqeda kudla ukudla okushisayo bese uphuza amanzi abandayo lapho amanziyo asho ukunqamuka.
Nensimbi-ke iba kuleso simo ichachambe kalula. Uma imoto seyike yabila washintshe namafutha enjinini ngoba uma kuxubane amafutha namanzi kusho ukuthi asuke engasekho ezingeni elifanele ukuba semotweni.
Ne-filter yamafutha isuke seyidinga ukushintshwa. Enye indlela yokuvika ukubila esebenza kwezinye izimoto, ukuthi uvule isiqandisi (air conditioner) kuyenzeka ithi ukuphola.
Idixa likamakhenikha liphinde leluleka ukuthi ifakwe umuthi ogeza ingaphakathi lenjini no-radiator imoto ebisishaye igaskhethi.
Nebala kube njalo yatholelwa yafakwa. Idunyiswe isikhashana namanzi axutshwe nalo muthi obizwa radiator flush namafutha axubene ne-engine flush maqede yaphalaziswa wonke amafutha namanzi.
Ibe isithelwa okusha maqede yaqiniswa wonke amabhawodi yaduma yalandela ezinye. Yalashwa kanjalo-ke imoto eyayiphethwe yikhanda.
Hhayi-ke sesingawacisha la ma-hazard ethu anamuhla ukuze siyobheka ukuthi siziphuzisile yini izimoto zethu amanzi zingaze ziphathwe amakhanda.
Sethembe sizoqhubeka nokushayela ngokubuswa yiyo yonke imithetho yezokushayela ebusa leli zwe, ukuze sihlangane sisawuphonsa umbalane nangesonto elizayo.
Kungenjalo asihlangane ekhasini lethu leFacebook elithi Igedlela Lami with Sthembiso Shangase. Yimi owenu nali ikheli ngezansi hazardiso@gmail.com