Bazimisele ngokwenza kahle
IQEMBU leVolkswagen Motorsport lizimisele ngokwenza kahle emjahweni wokugcina weSasol GTC Series eZwartkops, ePitoli, ngempelasonto.
“Umjaho wethu wokugcina eKyalami emasontweni ambalwa edlule waba nemiphumela emihle,” kusho iNhloko yeVolkswagen Motorsport, uMike Rowe.
URowe uthe uMathew Hodges waphuma phambili ngemuva kwemijaho emibili kwathi uzakwabo wabalwa nabaphambili emjahweni wesibili.
“Ngaphezu kwalokhu umshayeli omncane uKeagan Masters uvale isizini enhle ngokuba wumphetha weGTC2 kusasele umzuliswano wokugcina,” kusho uRowe.
Uthe uyazi ukuthi iZwartkops iza nenselelo entsha.
“IZwartkops ihlukile kuneKyalami kodwa sike saba nesivinini khona ngokudlule futhi uMathew noDaniel bazimisele ngokulwa ukuze banqobe umjaho.”
UHodges uthe kwaba mnandi ukuthi anqobe njengomshayeli wosuku eKyalami.
“Angifuni okudlula ukwenza okufanayo futhi ngale mpelasonto ngibonge iqembu neVolskwagen ngokwenza njalo,” kusho yena.
Uzakwabo uDaniel Rowe naye unezinhloso ezifanayo.
“Sisengamsiza uMathew ngokuthi anyuke ohlwini ngamaphuzu kodwa uma sizithola sisendaweni yokulwela ukunqoba ngizoyibamba ngazo zombili,” kuchaza uRowe.
Laba bashayeli ngeke kube yibo kuphela abazoshayela izimoto zomjaho zakwaVolkswagen eZwartkops. Kuzobe kukhona namaGolf GTI kaKeagan Masters noMandla Mdakane.
Ukuhlela ukuthi izimoto zizoqala kanjani kuzokwenziwa nmahlanje ntambama bese kuthi imijaho emibili ibe kusasa.