Iphoyisa elingaboni liklonyelisiwe
LICHONYWE uphaphe legwalagwala iphoyisa elingaboni emehlweni kodwa elenza umsebenzi oncomekayo esiteshini iDurban Harbour, eThekwini, ngesikhathi kunomcimbi wokuklomelisa abenza kahle eLangeni Hotel, ngoLwesihlanu.
USergeant Samkelo Ngobese (36) wasePhoenix unikezwe umklomelo wokuba wumsebenzi ogqugquzela abanye ukuthi bazikhandle emsebenzi wabo.
UNgobese uthe ngesikhathi evaleka amehlo ngo-2012 wazitshela ukuthi ufuna ukuqhubeka nempilo yakhe.
“Ngaqala ngo-2005 ukuba yiphoyisa. Ngisebenze eHabour kusukela ngo-2007. Ngo2012 ngaphathwa yikhanda elalibuhlungu kakhulu, kwagcina kuqhuma umthambo ophazamisa amehlo. Ngagcina ngingasaboni emehlweni. Ngihlale iminyaka emibili ekhaya ngabe sengibuyela emsebenzi ngo-2015,” kusho uNgobese.
Uthe impilo ibingelula ngoba bekumele ashintshe okuningi, ajwayele nokusebenza engaboni.
UNgobese usesebenza ehhovisi, lapho esebenza khona ehlezi phansi kanti ngaphambilini ubephuma esiteshini ayosebenzela nangaphandle enza neminye imisebenzi.
“Ngihlezi ngibagqugquzela abasebenzi ukuthi impilo iyaqhubeka. Noma yini ekuvelelayo esuke iyimbi, impilo iyaqhubeka kuphinde kuvele okuhle njengoba nami sengithole umklomelo,’’ kusho uNgobese.
Umphathi siteshi, uBrigadier Antony Gopaul, uthe kube wunyaka onzima esiteshini sakhe okufe kuwo abasebenzi babo ngoba izigebengu zifuna izibhamu zabo.
Uthe yize kunjalo uyaziqhenya ngokusebenza kanzima kwamaphoyisa esiteshini sakhe.
Isikhulumi sosuku ebezivela ehhovisi likazwelonke, uMajor General David Chilembe, sinxuse amaphoyisa ukuba angazihlanganisi nezenzo zokukhwabanisa ngoba kuba buhlungu uma sekumele axoshwe embuthweni. Unxuse amaphoyisa ukuba aqikelele ukuba angazilahli izibhamu zawo ngoba yizona abazisebenzisa ukuvikela umphakathi.
Umphathi wohlelo uncome umbutho wamaphoyisa ngokuvikela umphakathi. Amaphoyisa abeswenke econsa emcimbini.
Othole umklomelo omkhulukazi wokuba wumsebenzi ovelele kube nguDetective Constable Sibusiso Mthuli okuthiwa uyena obophe abantu abaningi ngamacala akade ewaphenya.