Kugqashuke izibopho iBucs inqoba
KUFANE nokugqashuka kwezibopho zamaketanga abekinatele i-Orlando Pirates enqobe okokuqala ngempelasonto ngemuva kwemidlalo eyisithupha ingawini kwi-Absa Premiership.
Lokhu kushiwo ngumqeqeshi wePirates, uMilutin “Micho” Sredojevic ephawula kwithelevishini ngemuva kokuthatha amaphuzu amathathu beshaya iBloemfontein Celtic ngo 1-0 wegoli likaMusa Nyatama emdlalweni weligi ngeSonto.
Ngalo mphumela leli qembu laseSoweto ligxumele endaweni yesibili kwi-log ngamaphuzu angu-18.
“Sidlale kahle kakhulu ngemuva kokuzilungiselela ekwakheni amathuba okushaya amagoli. Enye yazo kube wukuthi abadlali bazibeke ezindaweni ezingcono ebhokisini njengoba kwenzekile ngoMusa Nyatama ebese simphushele phambili,” kusho uSredojevic.
“Sisebenze kanzima ukuhlakaza lolu donga obelusivimbile emiqondweni yethu ngemuva kwemidlalo eyisithupha singawini. Ukuwina lokhu ngeke kugcine ngokusikhulula imiqondo kodwa kuzosiqaqa nemilenze njengoba uma ubophekile engqondweni nemilenze iyabophana.”
Amathambo abengahlangani impela kulesi sikhathi esicishe sibe yizinyanga ezimbili kwazise ngaphambi komdlalo weCeltic, iBucs yayigcine ukunqoba kwiligi ngoSepthemba ishaya iCape Town City.
Emdlalweni odlule weLamontville Golden Arrows ophele ngo 0-0, uMicho obebonakala esedidekile ngezinga lokugeja, wabalisa kakhulu ngesihlava asibona eNingizimu Afrika sokumoshwa kwamathuba amagoli. Njengoba enqobile uthe wethemba ukuthi bazoqhubeka nalo mgqigqo.
Umdlalo olandelayo bazothuthana kuwo neSuperSport United ngoDisemba 5 e-Orlando Stadium.
“Ibhola lidlalelwa abalandeli njengoba bebephume ngobuningi lapha (koweCeltic). Siyajabula kakhulu ngokuphumelela sibhekene neqembu elinzima. Sifuna abadlali baqhubeke nokudlalela leli bheji,” kusho uSredojevic.
Emdlalweni weCeltic kubuye noThami Sangweni obelimele kanti uLuvuyo Memela uthole ithuba waze waqokwa njengomdlali ovelele.
“Baningi abadlali abangqongqozayo. UMemela noSangweni yize bebekhombisa ukuthi abekho esimeni kodwa liyabonakala ithalente labo,” kusho Micho.
Emdlalweni olandelayo iBucs izobhekana neSuperSport United e-Orlando Stadium, eSoweto, ngoLwesibili oluzayo. Kusasa iSuperSport izobhekana ne-Ajax Cape Town eMbombela Stadium.
Imidlalo ye-Absa Premiership elandelayo:
Kusasa: SuperSport United v Ajax Cape Town (Mbombela Stadium, 7.30pm
NgoLwesibili (Disemba 5): Cape Town City FC v Maritzburg United (Athlone Stadium, 7.30); Mamelodi Sundowns v Baroka FC (Lucas Moripe Stadium, 7.30pm); Orlando Pirates v SuperSport United (Orlando Stadium, 7.30pm)
NgoLwesithathu (Disemba 6): AmaZulu FC v Bloemfontein Celtic (King Zwelithini Stadium, 7.30pm); Free State Stars v Golden Arrows (Goble Park, 7.30pm); Chippa United v Kaizer Chiefs (Nelson Mandela Bay Stadium, 7.30pm); Polokwane City v Platinum Stars (Old Peter Mokaba Stadium, 7.30pm); Bidvest Wits v Ajax Cape Town (Bidvest Stadium, 7.30pm)
NgoLwesihlanu (Disemba 8) Maritzburg United v Baroka FC (Harry Gwala Stadium, 8pm)