Yayingagwemeka eyaseSidimeni - ubufakazi
INHLANGANO elwela amalungelo abantu, iSouth African Human Rights Commission (SAHRC) ithi inhlekelele yaseLife Esidimeni eyabulala iziguli ezingu-143 eziphazamiseke ngokomqondo yayingagwemeka ukube abantu abakhubazekile banemizi efanele yokuhlala eNingizimu Afrika.
I-SAHRC iveze ukuthi kunesidingo sokuthi abantu abakhubazekile, abahlukunyezwayo nalabo abayimigilwa yezidakamizwa banikwe izindlu ezifanele.
UNksz Yuki Ramkissoon ongumcwaningi ophezulu kwiSAHRC uthe indaba yaseSidimeni ikubeka kucace ukuthi abakhubazekile badinga izindlu kanjalo badinga nezikhungo ezizokwazi ukubhekelela izidingo zabo.
“Asinalo uhlelo olucacile lokubhekelela abakhubazekile noma izikhungo zokubahlalisa,” kusho uNksz Ramkissoon.
Ngo-2015 owayengungqongqoshe wezeMpilo eGaunteng, uNksz Qedani Mahlangu wamemezela ukuthi iphelile inkontileka yomnyango wakhe neLife Esidimeni.
Abantu abangu-2 000 ababethola usizo olusezingeni eliphezulu lezifo zengqondo bakhishwa Esidimeni bayiswa ezinhlanganweni ezizimele ezazingenazo izinsiza zokubanakekela.
Iziguli ezingu-141 zashona emuva kokuthuthelwa ezikhungweni zomphakathi kanti ezingu-59 akwaziwa ukuthi zashonaphi.
“Kufanele sifunde kulokhu okwenzeke Esidimeni.
“Kufanele uhulumeni kazwelonke asebenzisane nowezifundazwe nezinhlangano ezizimele. Ukube lezi zinhlaka zazisebenzisana kwakuzogwemeka ukushona kwabantu,” kusho uNksz Ramkissoon.
Uphinde wagxeka uMnyango wezokuHlaliswa kwaBantu ngokungakhi izindawo ezanele zokuhlala abagula ngengqondo nabanokukhubazeka okuhlukene.
Uthe bafuna uhulumeni anikeze abakhubazekile izindlu ezisesimeni esibafanele.
UMnuz John Wallis woMnyango wezokuHlaliswa kwaBantu uthe uhulumeni uzophasisa umthetho wokwakhiwa kwezindlu ezihambisana nabakhubazekile nokuthi uma usuphasile kube lula ukubhekelela izidingo zabo.