ISars ivimbe imigunyathi kaR2.7billion
BANGU-5.6 million abantu abathumele imininingwane yabo enhlanganweni eqoqa intela iSouth African Revenue Service (Sars) kulo nyaka.
Esitatimendeni esithunyelelwe abezindaba, iSars iveze ukuthi ikhokhe uR18.5 billion obuyiselwe kubakhokhintela abangu-2.22 million.
Ukukhohwa kwale mali kusho ukuthi isibalo sababuyiselwe imali yiSars sinyuke ngo-26% esikhathini sokuqoqa intela esiqale ngoJulayi 1 saphela ngoNovemba 24.
“ISars iwuvimbile nomgunyathi wabantu abafuna ukukhokhelwa bengafanele ngokuthi baqambe amanga uma bethumela imininingwane yabo. Sikwaze ukuvimba uR2.7 billion obuzokhokhelwa laba bantu.
“Ngonyaka odlule kwakungu-R1.8 billion okusho ukuthi isimo sisiqaphe ngeso lokhozi kulokhu,” kusho abakwaSars esitatimendeni.
Ukuhambisa imininingwane yentela kuvalwe ngoLwesihlanu kodwa labo ababizwa ngamaProvisional Tax Payers banikwe kuze kube nguJanuwari 31 ukuthi bathumele imininingwane yabo besebenzisa i-internet (eFilling).
ISars iveze ukuthi u-94% wabantu uthumele imininingwane yabo yentela ngesikhathi. Ukwethulwa kohlelo lokuthi umuntu afake isithupha uma elethe imininingwane yentela kuthuthukise ezokuphepha kwemininingwane yabantu kwazise amanyela eminwe awafani.
“Isithupha siqukethe yonke imininingwane. Ngeke kwenzeke iphutha lokuthi imininingwane iphambane neyomunye,” kusho isitatimende.