Kulindwe isinqumo kwelokucwasa
SIZOPHUMA ngoFebhuwari wonyaka ozayo isinqumo ecaleni likaMnuz Andre Slade (51) nentombi yakhe uNksz Katarina Krizaniova (28) abanqaba ukuhlalisa abantu abamnyama nabasebenzi bakahulumeni endaweni yabo yokuhlalisa izivakashi eseSodwana Bay.
NgoLwesine uMnuz Andrew Zaloumis, owayeyisikhulu esiphezulu saseSimangaliso Wetland Park, ubeyofakaza enkantolo yeMantshi esoBombo lapho ethe uSlade kufanele ajeziswe kanzima ngokucwasa abantu.
Emaphepheni asenkantolo uZaloumis usole uSlade ngokucwasa abantu nangokungazisoli ngokwenza lokhu ekubeni ephila eNingizimu Afrika egcwele zonke izinhlanga.
IJaji uTamo Moodley uthe uzonquma ngoFebhuwari ukuthi kwenzekani ngoSlade nentombi yakhe.
Ngonyaka odlule uSlade wathusa iNingizimu Afrika yonke emuva kokuvela kwemibiko yokuthi abahlali abantu abamnyama endaweni yakhe eseSodwana Bay.
Waze wabhala kwi-website yakhe ukuthi iSodwana Bay Guest House ayizamukeli izivakashi ezimnyama nabasebenzi bakahulumeni.
Isenzo sakhe saholela ekutheni uNgqongqoshe wezokuThuthukiswa koMnotho, ezokuVakasha neMvelo KwaZuluNatal, uMnuz Sihle Zikalala, amphuce ilayisensi yebhizinisi lakhe.
Emuva kwalokho wavulelwa icala lokucwasa ngabaseSimangaliso Wetland Park naboMnyango wezokuVakasha kuzwelonke. Waphinde wamashelwa ngamaqembu epolitiki ekhala ngokuthi kufanele aboshwe ngoba iNingizimu Afrika yizwe lazo zonke izinhlanga.