OweCeltic awamethusi amava abeWits ngeseTKO
ISIZULU sithi lapho okwake kwama khona amanzi, aphinde ame. Yingakho noJacky Motshegwa weBloemfontein Celtic ebona iqembu lakhe lizophinde libe ngompetha beTelkom Knockout baka-2017.
Ngo-2012, uMotshegwa ubekwiPhunya Sele Sele ethele othulini iMamelodi Sundowns ngo 1-0 wegoli likaJoel Mogorosi eMoses Mabhida Stadium, eThekwini.
Ngaleso sikhathi iningi labathandi bebhola lalithipha iSundowns ekutheni idle umhlanganiso ngaphansi kukaJohan Neeskens. UMotshegwa utshele Isolezwe ukuthi yize iWits ingenzi kahle emidlalweni ye-Absa Premiership kodwa abaningi bayibona kuyiyona esethubeni elingcono lokunqoba isicoco seligi.
“Kuzoba ngumdlalo onzima kodwa nathi sisebenza ngokuzikhandla njengabadlali beCeltic ukuze sinqobe lo mqhudelwano njengoba senza ngo2012. Umqeqeshi nabaphathi basifaka ugqozi. Ukufinyelela emdlalweni wamanqamu akuyona into elula.
“Lapha kwiCeltic sisebenza njengeqembu. Wonke umuntu uthipha iWits ngoba babophele abadlali abanamava okudlala imidlalo yamanqamu. Mhlawumbe banabadlali abayisikhombisa asebenqobe isicoco seTelkom Knockout nezinye izicoco. Iqembu labo liyingozi yize bengenzi kahle emidlalweni yeligi. Ukufinyelela kwabo kowamanqamu kuyizinkomba zokuthi bayiqembu eliqinile. Ngeke ufike ngephutha kowamanqamu,” kusho uMotshegwa.
ICeltic isanqobe izicoco ezintathu selokhu kwasungulwa iPremier Soccer League (PSL) ngo-1996/1997. Ngo-2005 yadla umhlanganiso kwiSAA Super Eight kwathi ngo-2012 yakhala yemuka nesicoco seTKO.
“Umdlalo iwona ozosikhombisa ukuthi siqine kangakanani ngokomqondo njengabadlali ngoba sibhekene neqembu elibophele abadlali abanamava. Iqembu labo linabadlali abanjengoThabang Monare, Daine Klate noSteven Pienaar. Ukuze sinqobe umdlalo kumele sisebenze ngokuphindiwe,” kusho uMotshegwa.
ICeltic yenza kahle nasemidlalweni ye-Absa Premiership. Isiqoqe amaphuzu angu-16 emidlalweni engu11. Ihlukaniswe amaphuzu amathathu neBaroka FC eqhwakele.
“Usihlalo weqembu (uMax Tshabalala) ayikho imali asithembise yona. Into esiyaziyo wukuthi uma sinqoba sizojabula. Abaphathi bashilo ukuthi uma sibuya necoco nakanjani sizojabula njengeqembu. Abakufunayo nje wukuthi sihlwithe isicoco. Le ndebe ngifuna siyinqobele abalandeli bethu. Ungahamba umhlaba wonke ngeke ubathole abalandeli abafana nabeCeltic. Kumele siyinqobele bona,” kusho uMotshegwa.