Kuphelile obekuhlanganise uLunga neSelimathunzi
ISILOMO somethuli wezinhlelo ebese sizakhele udumo kwiSelimathunzi ekhonjiswa kuSABC 1 ngoLwesibili ebusuku sesithi khumu kulolu hlelo. ULunga Shabalala odabuka eSikhaleni, KwaZulu-Natal uvalelise ngoLwesibili ntambama kulolu hlelo.
UPhillip Mabitsela, wakwaSABC 1, uthe yize le nsizwa ivalelisile kodwa izogcina ukubonakala ohlelweni ngesonto elizayo.
“Kukhona isigaba sohlelo azobonakala kuso nokuzobe sekungesokugcina. Kodwa ubegcina ukulwethula kuleli sonto,” kusho uPhillip.
Uthe akekho ozovala isikhala sikaLunga njengoba kulolu hlelo ngezinye izikhathi kuba khona intsha nosaziwayo ababakhethayo ukuthi baye emicimbini ehlukene.
“UKhanya Mkhangisa noSphesihle Vazi bazoqhubeka nokubamba lolu hlelo.
“ISelimathunzi eminyakeni emihlanu kuze kube yimanje ibilokhu ilanda intsha engaziwa kodwa ethanda ukwethula izinhlelo ihambele imicimbi ehlukene ukuze iveze ikhono layo. Namanje uhlelo lusazoqhubeka nokwenza lokho,” kuchaza uPhillip.
Le nsizwa eneminyaka engu-28, yadla umhlanganiso ngo-2011 ngesikhathi kufunwa umethuli omusha.
Evalelisa ohlelweni ubonge ithuba alitholile nothando alukhonjiswe ngabantu bakuleli kule minyaka ethula uhlelo.
“Ngisazoqhubeka nokubonakala kwithelevishini. Ngiyabonga ngokungamukela emizini yenu njengoba ngafika ngimncane ngizoveza ithalente lami,” kuchaza uLunga.
Uthe uhlangane nabantu abehlukene afunde lukhulu kubona futhi ubonga kakhulu kubakhiqizi beSelimathunzi.
Uveze ukuthi maduze uzomemezela uhlelo olusha lwethelevishini azobonakala kulo.