Uzingqokloze nezingane zakhe
KUSOLWA ingxabano ethinta ukuyothwasa kukankosikazi ngenkani njengembangela yokuthi owesilisa waKwaGandaganda, eSweetwaters, eMgungundlovu abulale izingane zakhe ezimbili naye wazibulala.
UMnuz Thabiso Pakisa (40) utholwe enenxeba lokudutshulwa, izingane zakhe oPhumla (15) noLebo Pakisa (10) zatholwa zidutshuliwe ekamelweni lazo.
Lesi sehlo esingundabuzekwayo kule ndawo kuthiwa senzeke ngo-9 ebusuku ngeSonto.
Kuthiwa senzeke kukade kunomhlangano womndeni ngoMgqibelo lapho uPakisa ayebike khona ukuthi uma unkosikazi wakhe engabuyi lapho ethwasa khona uzozibulala nezingane.
Okhulumela amaphoyisa KwaZulu-Natal, uColonel Thembeka Mbele, uthe kuvulwe icala lokubulala nedokodo ngokushona komuntu. “Izingane ezimbili zitholwe zidutshuliwe ekamelweni lazo. Kusolwa ukuthi uyise uzibulele wabe esezidubula naye. Kusaphenywa ngembangela yalesi sigameko,” kusho uCol Mbele. Isolezwe lithole ngomthombo osondelene nalolu daba ukuthi uPakisa ongunogada ubengafuni nokuyizwa indaba yokuthwasa kukankosikazi wakhe. “Unkosikazi ubethwasa komunye umama KwaZayeka khona eSweetwaters. Umyeni wakhe ubethi bashomene ngokuqoma nomama obemthwasisa wabe esebiza umndeni ecela ukuba abuye lapho ethwasa khona,” kusho umthombo.
Imizamo yokuthola umndeni ayizange iphumelele.
Induna yendawo, uMnuz Mfiselwa Makhaye, ikhale kakhulu ngalesi sigameko esenzeke endaweni yenkosi uNsikayezwe Zondi.
“Ngiyile impela endaweni yesigameko ngafica izingane noyise bedindilizile. Kubuhlungu kakhulu okwenzeke kule ndawo futhi siyakukhuza njengobuholi. Okubuhlungu kakhulu wukuthi umndeni ubungenelele kulolu daba uzama ukuluxazulula kodwa kwaphetha ngale ndlela,” kusho uMakhaye.
Ikhansela lendawo, uNkk Jabu Ngubo, nalo lifikile lizobhonga emswaneni lathi lesi sigameko asamukelekile.
“Siyakukhuza ukuthi abantu bazame ukuxazulula izinkinga ngesibhamu. Uma kukhona ukungaboni ngaso linye abantu kumele baxoxe,” kusho uNkk Ngubo.
Kwenzeka lesi sigameko nje lesi yisikhathi sezinsuku ezingu-16 zokulwa nokuhlukunyezwa kwabesifazane nezingane.