AbeNFP bayaqhubeka nengqungquthela yabo
ABAZIBIZA ngesigungu esiphezulu kwiNFP bathi iyaqhubeka njengoba kuhleliwe ingqungquthela ezoba seMajuba FET College eNewcastle lapho kuzokhethwa khona ubuholi obusha bukazwelonke beqembu.
Esithangamini nabezindaba eThekwini izolo, ibamba likaNobhala-jikelele weNFP, uMnuz Phumlani Zwane, lithe kumi ngomumo ngamalungiselelo engqungquthela engempelasonto.
“Isigungu esiphezulu seqembu ihlandla laso eliphele ngoDisemba 4, 2016, sizokwedlulisa izintambo ebuholini obusha obuzokhethwa engqungqutheleni ezoba kule mpelasonto eqala ngoLwesihlanu iphele ngeSonto,” kusho uZwane.
UZwane uthe babonga amalungu eqembu nazo zonke izinhlaka ngokusebenzisana obekukhona.
“Singasho singananazi ukuthi iNFP iyaphila futhi iyakhula,” kusho uZwane.
Uzwakalise ukukhathazeka kwabo ngokugula kukamengameli uNkk Zanele Magwaza-Msibi.
“Siphatheke kabi ngokugula kukamengameli okugcine kubeke iqembu engcupheni,” kusho uZwane.
Uthe zizobangwa zonke izikhundla ngaphandle kwesikamengameli.
“Umthethosisekelo weqembu uthi umengameli unamahlandla amabili, okwamanje usanehlandla elilodwa ubengakasiqedi isikhathi sakhe,” kusho uZwane.
Okhulumela uKaMagwaza-Msibi, uMnuz Canaan Mdletshe, uthe ayikho emthethweni ingqungquthela ngoba ubuholi besifundazwe nobukazwelonke bahlakazwa.
Uthe bahlakazwa ngoba bahluleka ukulungiselela iqembu ukuthi libe nengqungquthela ngonyaka odlule.
“Asizikhathazi ngabo ngoba vele bahlakaziwe, ngumengameli kuphela osesikhundleni esisemthethweni. Wakhethwa engqungqutheleni yokusungulwa kweqembu ngo2011 lapho kwavunyelwana khona ukuthi uzophatha amahlandla amabili okuyiminyaka engu-10,” kusho uMdletshe.
Esikhundleni sePhini likaMengameli kuphakanyiswe uNkk Sindi MaphumuloMashinini obengumengameli wophiko lwabesifazane. Kuthiwa wesekwa yizinhlaka zonke zeqembu kanti kubhekwe ukuthi adle umhlanganiso kulesi sikhundla. Akucaci ukuthi iPhini likamengameli, uMnuz Alex Kekana, lizongena yini embangweni.
UZwane uthe KwaZulu-Natal balindele izithunywa ezingaphezulu kuka-1 000, 150 eGauteng, 100 e-Eastern Cape, 36 eFree State nezingu-10 eMpumalanga. Uthe ukuphakanyiswa kwamagama sekuqediwe.
Kwenzeka lokhu nje zonke izinhlaka zeNFP zahlakazwa nguNkk MagwazaMsibi esithangamini nabezindaba esasiseThekwini.
Kulesi sithangami uKekana babuyisana noKaMagwaza-Msibi, wahoxisa amacala ayemvulele wona uMdletshe uthe uKaMagwaza-Msibi uyaqhubeka nemisebenzi yeqembu njengoba ngoMgqibelo ezobe eseBaqulusini eyokhankasela ukhetho lokuchibiyela ngelizayo.