Kufunwa okungasiza abadayisayo
UKUNGALAWULWA kokuvulwa kwama-tuck shop emalokishini kuholela ekutheni abanikazi bawo bangathuthuki kuleli bhizinisi.
Lokhu kushiwo uNksz Nompilo Mbuthuma waseMawoti, eNanda oneminyaka ewu-10 ene-tuck shop kule ndawo.
UNksz Mbuthuma ubeyingxenye yabadayisi abebehambele imbizo yabadayisi baseThekwini ebihlelwe uMasipala, eCurries Fountein izolo.
Uqhube wathi ama-tuck shop emalokishini nasemijondolo asondelene kakhulu ngenxa yokuthi awukho umthetho olawula ukuthi kumele aqhelelane kangakanani.
“Kulokho kusondelana kwethu abanikazi bama-tuck shop bakwamanye amazwe badayisa izimpahla zabo ngemali ephansi. Amakhasimende aya kubo awethu ayawa,” kusho yena.
UNkk Lilian Mhlongo odayisa etafuleni eMakethe ekuWarwick, uthe kunzima satshe ukuncintisana nezitolo ezinkulu ezithe chithi saka kule ndawo, uma udayisa etafuleni.
Uthe waqala ukudayisa izithelo nemifino ngo-1999 emuva kokushonelwa umyeni.
“Ngisaqala izinto bezihamba kahle, ngemuva kwesikhathi kwafika izitolo ezinkulu ezidayisa izinto ezifanayo ngemali ephansi.
“Izinto zethu ziyabola, yikho sengidayisa imbiza namabhodlela,” kusho yena.
UNkk Mhlongo uthe unezingane ezinhlanu azondlayo ngemali yokudayisa. Imbiza yakhe uthe uyidayisa ngoR120.
UMnuz Vusi Nyawo we-Ithala Bank uthe kunohlelo lokuthenga ngokuhlanganyela olwenziwa yileli bhange ngokuhlanganyela noMasipala weTheku, ePhoenix, eNanda, Ntuzuma naKwaMashu (Pink).
Lolu hlelo ngolokubheka ukuthi le ndlela ingasebenza yini kubadayisi kule ndawo.
“Ngalolu hlelo kuba nososeshini wabadayisi, usoseshini ube nophiko lwawo lwebhizinisi olucishe lufane nestokofela. Abadayisi bafaka kulo imali.
“Lolu hlaka lwebhizinisi yilo oluya ebhange luyoboleka imali yokuthengela bonke abangaphansi kwalo usoseshini izinto zokudayisa. Izimpahla zithengwa kubakhiqizi.
“Sisahlola ukuthi luzosebenza yini ngaphambi kokuthi silusabalalise,” kuchaza uNyawo.
IMeya yeTheku uNkk Zandile Gumede, uthe yize ekuqonda ukuthi abadayisa ezitaladini nasema-tuck shop bakhuphula umnotho wakuleli dolobha kodwa ngeke akuvumele ukuthi abantu badayise kuwo wonke amakhona edolobha.