Zindala zombili kubaholi be-ANC
UMHLAZIYI wezepolitiki uMnuz Thabani Khumalo, uthi kuseva ukugaqula ukuthi imuphi umholi ozodla umhlanganiso njengoba uDkt Nkosazana Dlamini Zuma esephakanyiswe yizifundazwe ezintathu kwathi imbangi yakhe uMnuz Cyril Ramaphosa yaphakanyiswa izifundazwe ezimbili.
UKhumalo uthe ingqungquthela yaseMpumalanga yokuphakamisa abaholi abaya engqungqutheleni yangenyanga ezayo eNasrec, yokukhetha abaholi yiyona ebhekwe ngabomvu njengoba kungacaci ukuthi yeseka muphi umholi.
Ingqungquthela yaseMpumalanga ihlala kusasa.
UDkt Dlamini Zuma uphakanyiswe wuphiko lwabesifazane lwe-ANC nolwentsha, abathathwa njengezifundazwe ngokwe-ANC kanjalo nesifundazwe iFree State.
Ngakolunye uhlangothi uRamaphosa uphakanyiswe yiNorthern Cape neWestern Cape.
“Kuseva ukusho ukuthi ngubani ozodla umhlanganiso njengoba izifundazwe zihlukene phakathi. Uma ubheka izibalo zaseFree State kuba nokudideka ngendaba yabantu abavotile. NaseMpumalanga akucaci kahle ngoba usihlalo wakhona uMnuz David Mabuza, engazange afike ngesikhathi kunerali kaDlamini Zuma (Dkt) nekaRamaphosa, ngakho kunzima ukusho ukuthi kahle kahle lesi sifundazwe seseka bani,” kusho uKhumalo.
Usho lokhu nje namhlanje kuhlala ingqungquthela yaseEastern Cape okulindeleke ukuthi iphakamise uRamaphosa njengomengameli we-ANC ngoDisemba.
Isifundazwe iKwaZulu-Natal, engahlonizi ngokweseka uDkt Dlamini Zuma, ingqungquthela yayo yokuphakamisa abaholi kulindeleke ukuthi ibe sekuqaleni kwesonto elizayo.
UKhumalo uthe amaphaphu aphezulu kwi-ANC njengoba kuyiwa kule ngqungquthela.
Ukuphakanyiswa kwabaholi abaya kule ngqungquthela yizifundazwe akusho ukuthi yibona abazofike badle umhlanganiso njengoba nasengqungqutheleni amalungu avunyelwe ukuthi aphakamise umholi othile ukuthi angenele ukhetho uma esekwa u-25% wengqungquthela.
Angaphezulu kuka-5 000 amalungu azothamela le ngqungquthela.