Ithemba ngoshwele kwabadonsa udilikajele
ZIBEKE amathemba azo okuthola ushwele enkantolo eNkulu yaseThekwini iziboshwa ezingu-84 ezinye zazo ezaboshwa ngo-1995 kodwa ezinganikezwa ushwele.
Izolo, iziboshwa zaseNew Prison eMgungundlovu ezigwetshwe udilikajele, zifake isicelo sokuba zinikwe ithuba lokunikezwa ushwele njengoba sezibhadle ejele isikhathi eside.
Lezi ziboshwa okubalwa kuzo uSipho Mchunu, Nkosinathi Ntenza, Sthembiso Shelembe noNhlanhla Ndlovu ebizesenkantolo yaseThekwini, zikhala ngokuthi uMnyango wokuHlunyuleliswa ngeziMilo kuleli awuzinikezi ithuba lokufaka isicelo sikashwele yize sezihlale iminyaka ejele futhi zikwenze konke okudingekayo ukuba zidedelwe. Bezingu-90 iziboshwa ebezifakwe kumqulu wesicelo enkantolo kodwa ezinye zadedelwa ngoshwele udaba lungakayi enkantolo, abanye bahoxa kulesi sicelo ngezizathu ezahlukene. Ummeli wabo, u-Advocate Indhera Goberdhan utshele inkantolo ukuthi ngokoMthetho sisekelo wakuleli owawubekwe ngesikhathi beboshwa kumele engabe lezi zibosha ziyanikezwa ithuba lokufaka izicelo zikashwele.
Ijaji uLopez, (igama alitholakalanga), lilimise kathathu icala lithi akumele engabe lilalelwa enkantolo yaseThekwini ngoba lezi ziboshwa ziboshelwe eNew Prison, kumele engabe ziya enkantolo eNkulu yaseMgungundlovu.
Ummeli wabo uthe okwenza beze eThekwini wukuthi phambilini kule nkantolo kuke kwaba necala elifuze leli, laba yimpumelelo.
IJaji uLopes emuva kokumisa icala okwesikhashana libuye selithi: “NgoDisemba 13 nonyaka kunecala elifuze leli elizobe lingaphambi kwelinye ijaji kule nkantolo. Leli jaji livumile ukuthi lingakwazi ukulalela womabili la macala. Okunye okuhle wukuthi abasebenzi boMnyango wezokuHlunyuleliswa ngeziMilo bazobe bekhona lapha enkantolo ukuchaza izinto ezithize. Lokho kuzokwenza kube lula.”
Umqingo wesicelo salezi ziboshwa uveza ukuthi ezinye zazo zaboshwa phakathi kuka1994 no-2000.
Ezinye zazo kuvela ukuthi sezineziqu zemfundo ephakeme futhi zafunda izinhlelo eziningi ejele okwenza kucace ukuthi sezihlumulelisekile izimilo zazo. Zithi ngokwazo akubona ubulungiswa ukuba zigcinwe isikhathi esingaphezu kweminyaka engu-13 nezinyanga ejele ngoba ngokomthetho wakuleli uma sebehlale le minyaka basuke sebenganikwa ushwele.
Lezi ziboshwa zithi uhulumeni akumele athi abanye abangawutholi ushwele abakalwenzi uhlelo lokuxoxisana nemindeni yabagilwa iVictim Offender Dialogue (VOD), ngoba kuneziboshwa ezaboshwa lolu hlelo lungakabi semthethweni kulo mnyango.
Iziboshwa ebezisenkantolo beziswenke ziconsa, zifake ngisho othayi. Beziphethe amaphepha nokokubhala, zilokhu ziqobela phansi uma kukhulunywa enkantolo.
Lezi ziboshwa bezicele ijaji ukuba likhiphe isinqumo sokuba zingahlukunyezwa abasebenzi bomnyango uma sezibuyela ejele.
IJaji lithe alikwazi ukushaya umthetho ekubeni bungekho ubufakazi obuphambi kwalo obusho ukuthi laba bayahlukunyezwa ejele ngenxa yokufaka umnyango enkantolo.
Uthe uma kwenzeka behlukumezeka uma sebebuyela ejele, abothumela incwadi efungelwe enkantolo ngaphambi kokuba icala labo lihlale ngoDisemba 13 nonyaka.
Ummeli wabo uthe ujabule ukuthi inkantolo yaseThekwini izolilalela icala yize iziboshwa ziseMgungundlovu.