‘Uqola abantu ngegama lami’
USELUBIKE emaphoyiseni uSomlomo kaMasipala waseNdumeni, uNkk Bongiwe Mbatha-Makhathini, udaba lomuntu oqola abantu ezinkundleni zokuxhumana esebenzisa igama lakhe.
UNkk Mbatha-Makhathini uthe uqale ukuzwa ngalo muntu oqola abantu ngegama lakhe kumlingani wakhe osebenza kuMasipala waseMzinyathi owambuza ukuthi nguyena ngempela yini obemcela i-airtime.
“Ngathuka ngamtshela ukuthi angikaze ngiyicele i-airtime,” kusho uNkk Mbatha-Makhathini.
Uthe iqola lizenza yena kuFacebook, lize lifake nezithombe zakhe.
“Uyazishintsha izithombe zami, uthatha lezi engisuke ngizifake kuFacebook wami,” kusho uNkk Mbatha-Makhathini.
Uxwayise abantu ukuthi bangamuphi imali uma ebacela.
“Angiyiceli imali mina namaairtime, lo muntu owenza le nto ezenza mina yiqola elidinga ukuboshwa,” kusho uNkk MbathaMakhathini.
Uthe uyabona ukuthi wumuntu osondelene naye lo owenza le nto uhlose ukudicilela phansi isithunzi sakhe.
UNkk Mbatha-Makhathini uthe baningi abantu abaziyo abanye abangamakhansela abamshayela ucingo beqinisekisa ukuthi nguyena ngempela yini obacela imali.
“Ngisanda kuthintwa yikhansela laseNquthu liqinisekisa ukuthi yimina ngempela yini ebengicela imali,” kusho uNkk Mbatha-Makhathini.
Uthe ubona ukuthi lo muntu uqola kakhulu amakhansela eMzinyathi.
“Usanda kuqola nomshana wami ngokumcela imali. Uma uke wamnika kanye usuke usuzilayile ngoba akabe esasuka kuwe. Ngendlela ayisigebengu ngayo uze athi uma umnika imali izobuya isihamba ne-drink ngaphezulu,” kusho uNkk Mbatha-Makhathini.
Uthe akuqali ukuthi kube khona ikhansela laseMzinyathi okusetshenziswa igama lalo kuqolwa abantu.
“Inombolo yalo muntu nginayo ngike ngamshayela walubamba ucingo, ngamtshela ukuthi akayiyeke le nto ayenzayo ngoba ngizombopha kodwa uyaqhubeka nalo mkhuba wakhe,” kusho uNkk Mbatha-Makhathini.
Okhulumela amaphoyisa KwaZulu-Natal, uLt Colonel Thulani Zwane, uthe lukhona udaba lokuqola olubikwe esiteshini samaphoyisa aseDundee olulandelwayo.