Bagcwele ukuzethemba abayisa i-ANC enkantolo
ULAWRENCE Dube nahambisana nabo bathi bazophindela enkantolo eMgungundlovu namhlanje beqalabile bezokuzwa noma isicelo sabo sokuthi bavunyelwe ukuthi balandele isinqumo senkantolo yokuqala siyaphumelela yini.
UDube nabanye, abaziwa “njengamavukelambuso”, bacela ukuthi bavunyelwe ukulandela isinqumo senkantolo yokuqala ngesikhathi leso sinqumo sisadluliselwe enkantolo yokudlulisela amacala.
Uma “amavukelambuso” evunwa yinkantolo, lokho kuyosho ukuthi simile isinqumo sangoSepthemba sokuthathwa kwengqungquthela njengento engekho kuze kulalelwe uhlangothi lwesigungu sesifundazwe oluholwa nguMnuz Sihle Zikalala enkantolo yokudluliswa kwamacala.
“Sesinqobile, angingabazi ukuthi ngeke sihlale isikhathi eside enkantolo,” kusho uDube ngokuzethemba.
Kubukeka sengathi amalungu aseka lezi zinhlangothi ngeke aphume ngothi lwawo ukuya enkantolo.
Bobabili oDube nokhulumela i-ANC, uMnuz Mdumiseni Ntuli, bathe abawacelanga amalungu abo ukuthi azobeseka enkantolo.
UDube uthe abazange babize amalungu ukuthi azobeseka ngaphandle enkantolo wathi uzobe engaphakathi enkantolo nasondelene nabo.
“Ngalesi sikhathi wonke umuntu umatasa ulungiselela ingqungquthela, sifuna bagxile kulokho. Kuzoshesha enkantolo ngakho wonke umuntu akagxile engqungqutheleni,” kusho uDube.
UNtuli uthe uzoba khona enkantolo wathi abazange bameme abantu abazobaseka ngaphandle kwedlanzana elizobe lisenkantolo.
Okhulumela ezikaDube, uMnuz Sthembiso Mshengu, uthe balindele labo abangakwazi ukufika enkantolo ukuthi bazobeseka kodwa akukho abakuhlelile.