UZuma uzovula umgwaqo uDumisani Makhaye
UZOVULWA umengameli wezwe uJacob Zuma ngoMgqibelo umgwaqo omkhulukazi ohlanganisa Inanda, KwaMashu, Newlands neClermont, uDumisani Makhaye.
UZuma uzovula umgwaqo owakhiwe ngo-R1.3 billion othathwa njengemali eningi etshalwe nguhulumeni ohlelweni lwentuthuko.
Uqanjwe ngoMnuz Dumisani Makhaye, owayengungqongqoshe weminyango ehlukene KwaZulu-Natal ngaphambi kokuthi ashone.
UMakhaye wazakhela udumo ngesikhathi akha imigwaqo namabhuloho esengungqongqoshe.
Esitatimendeni esithunyelwe ngabomnyango wezokuthutha KwaZulu-Natal bathe umgwaqo uzosiza ukwenza impilo ibe lula kubantu baKwaZuluNatal, uthuthukise nomnotho.
Umgwaqo uDumisani Makhaye uhlanganisa uDuffs Road KwaMashu noDinkelman eNew Germany.
Umgwaqo uzophinde ulekelele ukuthi abaya esikhumulweni sezindiza eKing Shaka banqamule kuwo uma kunesiminyaminya emgwaqweni onguthelawayeka.
Umcimbi wokuvula umgwaqo uzoqala ngo10.30 ekuseni, eSugar Ray Xulu Stadium, eClermont.
Ngaphambi kokwakhiwa komgwaqo uDumisani Makhaye abantu abasuka KwaMashu beya ePinetown bebeqala bagibele izimoto eziya enkabeni yeTheku bese bexhuma eziya ePinetown.
Manje basuka KwaMashu, banqamule KwaDabeka, badlulele eNew Germany bese bengena ePinetown.
Uhambo lwabo lubathatha imizuzu engu-20 akufani nakuqala lapho kwakubathatha ihora ukuya ePinetown.
Uhulumeni ugqobhe amatshe wasusa namahlathi abehlukanisa iNanda, KwaMashu, Clermont nePinetown ukuze kwakhiwe umgwaqo.