Kuphasiswe owelivu yobaba abazele
KWAMUKELWE ukuphasiswa komthetho ozonika obaba ilivu yezinsuku ezingu-10 uma kuzelwe izingane.
Lo mthetho, iLabour Laws Amendment Bill, uphasiswe yiPhalamende ngoLwesibili ngemuva kokuphakanyiswa yilungu le-ACDP ePhalamende, uNksz Cheryllyn Dudley, ukuthi abesilisa kumele bathole ilivu yezinsuku ezengeziwe uma kuzelwe umntwana ekhaya.
Okunye okuqukethwe yilo mthetho ngukuthi labo abasuke bethathe izingane ezintandaneni bezozikhulisa (adoption) nabo bathole ilivu yezinsuku ezingu-10 uma izingane zingaphansi kweminyaka emibili.
Umxhumanisi weCosatu ePhalamende, uMnuz Matthew Parks, uthe kuqopheke umlando ngokuphasiswa kwalo mthetho ngoba ngenye yezinto abebezilwa bewumfelandawonye.
Uthe ngalo mthetho abesilisa bazozuza kakhulu ngoba bazothola ilivu yokukhulisa umntwana.
“Sinxusa umkhandlu wezifundazwe ukuthi usheshise uwuphasise lo mthetho uma kuqala unyaka ozayo.
“Ngaphansi kwalo mthetho kuzonyuswa imali esikhwameni i-UIF isuke ezinsukwini ezingu-238 iye kwezingu-365,” kusho uParks.
UParks uthe ezinye zezinto ezikulo mthetho ngukuhlukaniswa kwemihlomulo etholwa abesifazane abasekhefini lokubeletha neye-UIF.
Okunye ngukuthi abasebenzi bakahulumeni bafakwe esikhwameni se-UIF baphinde bathole isinxephezelo uma bexoshwa emsebenzini.
UParks uthe lona ngumthetho wesibili kuleli osuphasiswe yiPhalamende kusukela ngo1994 osuke ufakwe amalungu ePhalamende ngokuzimela.
“Kumele ngabe kade waphasiswa umthetho ngoba ubuzosiza abasebenzi basezimayini nabanye abasebenzi abalahlekelwa wumsebenzi eminyakeni edlule,” kusho uParks.
Umholi we-ACDP, uMfundisi Kenneth Meshoe, esitatimendeni uhalalisele uNksz Dudley ngokuthi lo mthetho ugcine uphasisiwe.
“I-ACDP ihlale ilwela ukuvikelwa kwezingane ngokuthi zihlale ekhaya elifudumele. Lo mthetho awugcini ngokuthi kunikwe obaba ilivu kodwa abazali bazohlomula esikhwameni i-UIF,” kusho uMeshoe.
Uthe kuyaqala ukuthi ilungu leqembu eliphikisayo lenze isiphakamiso esigcina sesiphasiswa yiPhalamende.