Luphothulwa ngozayo ucwaningo ngomthelela wezinto zokuhlela
LUZOPHOTHULWA ngonyaka ozayo ucwaningo olubheka ukuthi ngabe izinto zokuhlela umndeni zinomthelela yini ekutholeni kwabesifazane abazisebenzisayo igciwane lengculazi.
Ucwaningo olwenziwa yiMaternal Adolescent and Child Health Research (MatCH) engaphansi kweWits University, luyingxenye yocwaningo olwenziwa emazweni amaningi okubalwa kuwo iKenya, Zambia neSwaziland.
UNkk Busi Maphumulo wesikhungo seMatCH esiseThekwini uthe ucwaningo olwenziwa kwabesifazane abangu-7000 luqalwe ngo-2015 kanti kulindeleke ukuthi luphothulwe ngonyaka ozayo.
Uthe lusungulwe ngemuva kokuthi kube nolunye ucwaningo oluveze ukuthi u-80% wabesifazane abasebenzisa izinto zokuhlela batheleleka ngegciwane lengculazi.
“Njengabacwaningi asikwazi ukuthi yindlela yokuziphatha kwabantu eholela kulesi simo noma sithi kunezithako ezithile ezintweni zokuhlela eziholela ekutheni amasosha omzimba wowesifazane abe ntekenteke okwenza ukuthi kube lula ukuthi angenwe yigciwane lengculazi. Kumele sibheke imiphumela yocwaningo lwethu kube yiyo ekhipha izimpendulo,” kusho uNkk Maphumulo.
Uthe kunenkolelo yokuthi ama-hormones afakwa ezintweni zokuhlela enza amasosha abe ntekenteke.
“Esikwaziyo wukuthi izinto zokuhlela eziningi zaqala ukukhiqizwa kudala igciwane lengculazi lingakabi khona noma lingakasabalali kakhulu. Abakhiqizi bazo abazange balubheke uhlangothi lokuthi ngabe ayakwenza yini ukuthi amasosha abe ntekenteke ngoba sasingekho lesi sifo. Ngakolunye uhlangothi kuthiwa abesifazane abahlelayo basuke bekhathazeke ngokuthi bangakhulelwa kunokuthi bakhathazeke ngokungenwa yigciwane. Imiphumela yocwaningo sifuna isinike okuyiqiniso kulezi zinto ezishiwoyo,” kusho yena.
UNkk Maphumulo lokhu ukusho ngesikhathi kunomhlangano wokucobelelana ngolwazi oluthinta ingculazi nokuhlukunyezwa kwabesifazane obuhlelwe yiSouth African Positive Women Ambassadors, eSiphingo, izolo.
Ingxenye yabesifazane abakulolu cwaningo ngeyakhona eSiphingo.
UNksz Ntokozo Madlala, weWomen Empower, uthe umphakathi unomkhuba wokwamukela izinto okumele ngabe ziyakhuzwa, zibhebhetheke kuze kube khona umuntu ofayo ngaphambi kokubona ukuthi zimbi.
“Kunomuzi endaweni okwaziwayo ukuthi kuhlala kunomsindo indoda yakhona ishaya umama. Uma kuthulekile baze basho ukuthi kwathuleka namhlanje kulo muzi. Kuyoze kuthi sekuphele izinsuku kube yima kuyobhekwa ukuthi kwenzenjani bafice owesifazane eseshonile. Uzwa kubatshazwa kuthiwa kanti ubesemshayela ukumbulala! Sengathi ukushaywa akuyona inkinga,” kusho uNksz Madlala.