Asipholi isilonda sokuhlukana kwabazali
UKUHLUKANA kwabazali ngezinye zezinto ezibalwa njengembangela yokuhlukumezeka kwezingane.
Lokhu kushiwo uNkk Pearl Ramotsamayi ongumeluleki wemindeni esikhungweni iFamily And Marriage Society of South Africa (FAMSA), eThekwini.
UNkk Ramotsamayi ubephawula ngalokhu njengoba elakuleli ligubha izinsuku ezingu-16 zomkhankaso wokulwa nokuhlukunyezwa kwezingane nabesifazane, oqale ngoNovemba 25 ophela ngoDisemba 10.
Ngokusho kwakhe, ukungezwani kwabazali okugcina ngokuthi baphoqeleke ukuthi bahlukanise, kuyazilimaza izingane emoyeni.
Uthe ngesikhathi abazali besesezinhlelweni zokuhlukanisa, bavamise ukusebenzisa izingane ukulwa izimpi zabo.
“Lokho kuholelela ekutheni kwande isizwe esigcwele inzondo, okuzokuthi kusasa naso sifune ukuziphindisela. Kumele abazali bazivikele izingane zabo,” kusho uNkk Ramotsamayi.
Uthe izibazi ezihlala emphefumulweni womuntu zinzima, yingakho kumele zigwenywe ngayo yonke indlela.
Nazi ezinye zezinto uNkk Ramotsamayi athi zingenziwa abazali ukuvikela izingane zabo uma sebethathe isinqumo sokuhlukanisa:
* Kumele babahlalise phansi abantwana babachazele ngokwenzekayo, bangasho ukuthi bazozibonela bona ukuthi kwenzekani. Uthe akukhatheleki ukuthi bancane kangakanani, abachazelwe ngokwenzekayo.
* Akumele izingane zizigxeke ngokuthi zaba nephutha ngokuhlukana kwabazali bazo, yingakho kumele abazali bazichazele ngaso sonke isimo ababhekene naso.
* Akumele abazali balwe phambi kwezingane noma ngabe sebethathe isinqumo sokuhlukanisa.
* Abazali abakufunde besahlukanisa ukuthi izingane zinelungelo lokuhlala kubona bobabili isikhathi esilinganayo.
“Sinxusa abazali ukuthi bazisebenzise izikhungo zethu zokweluleka umphakathi kwezobudlelwano, ngoba isikhathi esiningi beza kithina sebevele benezinkinga,” kusho uNkk Ramotsamayi.
Uthe ukuza kwabo sebenezinkinga, kuholela ekutheni bathathe izinqumo ezingaphusile.
“Iningi labo liza kithina seliphoqwa yinkantolo kanti ukube baqale kithina izinto zingakonakali kakhulu, sisuke sisengakwazi ukuthi sizilungise isimo sibuyele kwesifanele,” kusho uNkk Ramotsamayi.
Umeluleki wezingane ezihlukumezekile kwaChildline SA, uNksz Dumisile Nala uthe kubalulekile ukuthi abazali bahlale bebeka
amalungelo ezingane phambili ukuze noma ngabe kwenzekani phakathi kwabo bazivikele.
“Ukudivosa kwabazali kuhlala ngaso sonke isikhathi kunomthelela ongemuhle ezinganeni,’’ kusho uNksz Nala.
Ezinye zezinto uNksz Nala athe abazali kumele bazichaze ezinganeni zabo uma besezinhlelweni zokuhlukanisa yilezi:
Ukuhlela ukuthi njengabazali bazozenzenjani izingane zabo uma sebedivosile.
Ngaso sonke isikhathi izingane zisuke zidinga ukunakekelwa abantu abadala, abazali mabangasebenzisi zona ezingxabanweni zabo.
Uxwayise abazali ukuthi bapheze ukusebenzisa ithuba lokuxabana nokulwa ngesikhathi izingane sezilele.
“Abazali bangazitshela ukuthi izingane zilele kanti zisuke zizwa futhi zibona yonke into eyenzekayo,” kusho uNksz Nala.