Kufunwa amasu okulwa nezinambuzane ezishaya ummbila
IZINHLANGANO zezolimo e-Afrika eseNingizimu zinethemba lokuthi izinhlelo zazo zokunqanda izinambuzane ezibizwa nge-armyworm, ezishaya ummbila ziwubhuqe, zizozithena amandla.
Lezi zinambuzane zasemazweni aphesheya zihlasele abalimi ezifundeni ezinhlanu kwezingu-11 KwaZulu-Natal ekuqaleni kwalo nyaka.
Iningi labalimi lilahlekelwe yimali eningi ngenxa yokuthi ummbila wabo uhlaselwe yizinambuzane.
Ngesikhathi zihlasela kuleli ibingekho imithi yokuzibulala ngoba bezingakaze zibe khona.
UNksz Rachel Nadelenga wenhlangano yezolimo engaphansi kwe-United Nations, eNingizimu Afrika, iFood and Agriculture Organisation (FAO), United Nations Resilience uthe ukungena kwezinambuzane kuleli kulimaze abalimi abaningi.
“Abalimi bebesanda kudlula esimeni esibi sesomiso naso esibe nomthelela omubi kubo. Kuthe sebenethemba lokuthi isimo sesiqala ukuba ngcono kwahlasela izinambuzane. Kusukela zihlasele kube nezinhlelo eziningi zesikhashana nezesikhathi eside eziqhamuke nohulumeni nezinhlangano zezolimo e-Afrika eseNingizimu. Lezi zinhlelo kumele sibonisane ngazo ngokuhlanganyela bese siqhamuka nemigomo yokusetshenziswa kwezibulali zinambuzane,” kusho uNksz Nadelenga.
Uqhube wathi kuleli sonto iFAO, uMnyango wezoLimo, ukuDoba namaHlathi kuleli, iCrops Programme of Southern African Development Commnunity bazoba nomhlangano wokudingida amasu abanawo okulwa nezinambuzane.
Umhlangano oseGauteng uqala namuhla uphele kusasa.