Kwelulwe isikhathi sezincomo ngomthetho
UMNYANGO weMfundo eyisiSekelo usulule isikhathi sokuthi kulethwe izincomo ngokuchitshiyelwa komthethosivivinywa iBasic Laws Amendment Bill (BELA).
Ngalo mthethosivivinywa kuhloswe ukubuyisela amandla okunquma ukuthi isikole sesigcwele, ukwamukelwa kwabafundi nezilimi ezifundwa ezikoleni okungamandla abelele ezigungwini ezilawula izikole kodwa ngokweziphakamiso ezikhona lawa mandla azobuyela enhlokweni yoMnyango wezeMfundo ezifundazweni.
Ezinye zeziphakamiso ngukuthi umzali onqabela ukuyisa ingane esikoleni kumele aboshwe agwetshwe iminyaka eyisithupha njengoba manje egwetshwa izinyanga eziyisithupha.
Okhulumela umnyango, uMnuz Elijah Mhlanga, uthe abantu basengaziletha izincomo zabo mayelana nalo mthethosivivinywa.
Uthe ziningi izincomo abazitholile ngawo wathi lokhu kukhombisa ukuthi abantu bayikhathalele imfundo. “Kuzovulwa elinye ithuba uma iPhalamende selenza izigcawu zokuhambela imiphakathi. Abantu abathumele ukuphawula kwabo mayelana nezinye izinto eziqukethwe kulo mthetho,” kusho uMhlanga.
USihlalo wekomiti lezemfundo ePhalamende, uNkk Nomalungelo Gina, uqinisekise umphakathi ukuthi uzolithola elinye ithuba lokuthi uphawule ngalo mthethosivivinywa uma sekunezigcawu zomphakathi.
Uthe baningi abantu abatshengise ukuthakasela indaba yalo mthethosivivinywa wathi bayazifuna izikhalo zomphakathi ngawo.
“Uma ususezithebeni zePhalamende ngonyaka ozayo sizozithola izincomo zomphakathi. Siyakwamukela ukululwa kwesikhathi sokuthi abantu balethe izincomo njengoba kuzovalwa ngoJanuwari 10, 2018,” kusho uNkk Gina.
Uthe ezinye zezinto eziqukethwe kulo mthethosivivinywa yindaba yokungavunyelwa kotshwala ezikoleni nokuqinisekisa ukuthi awathunazwa amasiko nezinkolelo zabafundi.
UMhlanga uthe bazozibheka zonke izincomo ezizokwenziwa wumphakathi.
Ngo-2013 uNgqongqoshe walo mnyango, uNkk Angie Motshekga, wajuba ithimba elalizobhekela ukubuyekeza umthethosivivinywa.
Leli thimba lalihlanganisa izazi zomthetho zaseWestern Cape, Gauteng, Free State naKwaZulu-Natal.
Kuhlale kunezikhalo kubazali abasuke befuna ukufundisa izingane zabo ezikoleni ezazingamaModel C njengoba bengamukelwa kulezi zikole kuthiwa sekugcwele.
Omunye wabahloli eThekwini ongavumelekile ukuphawula kwabezindaba, uthe eMlaza nasePinetown kuhlale kunezikhalo ezifanayo abazali bechithwa kulezi zikole kuthiwe sekugcwele.
Lezi zikole zijwayele ukuchitha abazali ngokuthi uma bengahlali noma bengasebenzi eduzane kwalezi zikole umfundi akamukelwa.