Isikhulu sezemfundo sicacisa ngohlelo lokuqasha abamaka u-matric
ISIKHULU esibhekele izivivinyo emnyangweni wezemfundo KwaZulu-Natal sesifanise othisha abakhala ngokuthi abazange baqokelwe ukumaka u-matric njengosomabhizinisi abakhalayo uma bengayitholanga ithenda.
UDkt Barney Mthembu, ufanise ukumaka nethenda ehlale iconselwa amathe abaningi.
Kube nesikhalo kwezinye zezinyunyana ngokuthi kuqashwe othisha abangawufundisi u-matric ukumakela abafundi bakwa-matric.
UMthembu uvumile ukuthi kuyenzeka baqashe othisha abangalifundisi leli banga ukuyomaka.
“Kwesinye isikhathi uthola ukuthi isifundo esifana nezilimi zidinga abamaki abaningi. Siya kwamanye amabanga, siqale kuGrade 11 sibheke othisha abafundisa lezi zilimi. Umuntu esimthathayo, ofundisa leli banga, uma engekho sithathe omunye oke walifundisa eminyakeni emithathu edlule noma kungathiwa usefundisa elinye ibanga,” kusho uMthembu. Ukumakwa kuqala ngempelasonto kuphothulwa ngoDisemba 14.
UMthembu uthe othisha bafike bafundiswe indlela abazomaka ngayo kubhungwe ngephepha abazobe belisebenzisa bemaka.
Omunye wothisha okhulume neSolezwe, wacela ukungavezwa, uthe sekuneminyaka efaka isicelo sokumaka kodwa akhale ngaphansi. Uthe uthola imiphumela emihle kwiLife Sciences futhi ufundisa u-matric kodwa akakaze aqashwe ukuyomaka. “Iyasikhalisa le nto ngoba siyazi kuqashwa abantu abangawufundisi u-matric. Sikhona sithola o-100% kwa-matric ezifundweni zethu kodwa asiqashwa. Siyasola kuhamba ngetiye ukuqashwa kwabamakayo,” kusho lo thisha othe baningi nabanye ozakwabo abakhala esifanayo.
UNgqongqoshe wezeMfundo esifundazweni, uMnuz Mthandeni Dlungwane, uthe bacela ku-90 000 othisha esifundazweni ngakho ngeke bamukelwe bonke ukuyomaka. “Ngeneme ngendlela okuqokwe ngayo othisha abayomaka.”
UMthembu uphawule nangamamaki onyaka aziwa nge-Cass Mark umfundi aya nalo ezivivinyweni elenza u-25% wezivivinyo.
Uthe abakaze babe nezinkinga ezinkulu ngaphandle kokuthi umkhandlu oqinisekisa izingabunjalo lezemfundo, uMalusi uye ubheke ukuthi leli maki liyahambisana yini nalokhu obekutholwa ngumfundi unyaka wonke.
“Uye uthole ukuthi umfundi unikwe u-90% wonyaka wonke kodwa ezivivinyweni bese eshaya udaka athole u-10%. Umalusi ube usulehlisa leli maki ngoba kusuke kucaca ukuthi umfundi usuke ephiwe lona. Sibaqeqeshile othisha ngendaba yokuthi kumele bayenzenjani indaba ye-Cass Mark,” kusho uMthembu.