Abalutholi usizo abagilwa ngokocansi
IZIKHUNGO zezempilo zakuleli okufanele engabe zisiza abesifazane abahlukunyezwa ngokocansi ziyahluleka ukubasiza ngendlela.
Lokhu kuvezwe umbiko wenhlangano yezempilo iMédecins Sans Frontières/ Doctors Without Borders (MSF), owethulwe ngoLwesibili, eGauteng.
Zingu- 265 izikhungo zezempilo ezifundazweni zakuleli okwaziwa ukuthi zihlinzeka usizo lwezempilo kwabesifazane abasuke bengabagilwa bokudlwengulwa. U-85% walezi zikhungo usezibhedlela ngaphakathi. U-56% walezi zikhungo zilinda odokotela ukuze kube yibo abahlola abesifazane abadlwenguliwe. Umbiko uthe lokhu kuholela ekutheni abesifazane abadlwenguliwe balinde isikhathi eside ukuze bathole usizo.
Lo mbiko uphinde uveze ukuthi zingu27% kuphela izikhungo ezihlinzeka usizo lokululekwa ngokwengqondo. U-28% walezi zikhungo azinabo osonhlalakahle futhi ezinye azikwazi ukuhlola abesifazane ukuze bathole ubufakazi obungasiza uma icala lokudlwengula selisenkantolo.
Kuphinde kwavela ukuthi izikhungo eziningi azinazo izinsiza ezisuke zidingwa abesifazane abadlwenguliwe njengemishanguzo yokuvikela igciwane lengculazi i-post-exposure prophylaxis, imishanguzo yokuvikela ukukhulelwa nokunye.
Abacwaningi bathe kufanele umnyango wezempilo ushintshe indlela okusetshenzwa ngayo ezikhungweni zawo ukuze uqinisekise ukuthi bathola usizo ngokushesha abesifazane abakhulelwe.
UDkt Amir Shroufi ongumgqugquzeli wezinhlelo zezempilo kwi-MSF kuleli uthe akufanele abesifazane abadlwenguliwe baye ezindaweni eziningi ukuze bathole usizo.
“Kubalulekile ukuthi abagilwa bokudlwengulwa bathole lonke usizo abaludingayo endaweni eyodwa,” kusho uDkt Shroufi.
Kwezinye izifundazwe okubalwa kuzo iNorth West kuvele ukuthi abasebenzi bezempilo abaqeqeshiwe ngokwenele ukuze bakwazi ukunakekela abesifazane abadlwenguliwe.
Okhulumela uMnyango wezeMpilo kuzwelonke, uMnuz Popo Maja uthe sebewubonile umbiko.
Uthe bayakwamukela okushiwo yiwo. UMaja uthe izikhungo zezempilo zikahulumeni ziphansi kwengcindezi ngenxa yesibalo sabantu abathola usizo kuzona nokwenza kube nzima ukuthi zibe nezinsiza ezenele.
Uthe banethemba lokuthi ukulethwa komshwalense wezempilo kahulumeni, iNational Health Insurance (NHI) kuzokwenza umehluko.