I-ANC ayingayithathi kancane eyendle KwaDukuza
NGESIKHATHI obengumengameli waseZimbabwe, uMnuz Robert Mugabe, ephilisa kabuhlungu izakhamuzi abeziphethe, uphiko lwentsha lweZanu-PF ngezinye zezinto ezasetshenziswa ukulwa nezimbangi.
Ngesikhathi esandulela ukhetho lwango-2008 kuleli zwe, uphiko lwentsha lwaluhamba phambili ezigamekweni zodlame ezaholela ekuhlaselweni nasekubulaweni kwezinkulungwane zabalandeli beMDC ababehlushelwa ukungahambisani noMugabe.
Lokhu kwakwenziwa njalo yinhlangano eyaletha inkululeko nentando yabantu eZimbabwe.
NjengeZanu-PF eZimbabwe, lapha eNingizimu Afrika i-ANC iyona okufanele ihambe phambili ekuvikeleni izimiso zoMthethosisekelo ezinikeza wonke umuntu ilungelo lokubeka umbono wakhe ngokukhululeka futhi nokuzikhethela afisa ukuzihlanganisa nakho.
Yingakho nje sinyanyeka isenzo se-ANCYL KwaDukuza sokuphazamisa owayenguNgqongqoshe weziMali, uMnuz Pravin Gordhan.
UGordhan, owayepheke ngebhodwe elincane uNgqongqoshe wamaBhizinisi kaHulumeni uNksz Lynne Brown esigcawini esiphenya ngokwenzeka kwa-Eskom mayelana nokulawulwa kombuso yidlanzana, ubemenywe ukuthi akhulume emcimbini obuKwaDukuza ngeSonto.
Nokho-ke amalungu e-ANCYL acasukile ukuzwa ukuthi uzobe ekhona uGordhan kanti kuthiwa abeke amabhakede amabili anendle emnyango wehholo abezokhuluma kulo.
Kumele sikusho ukuthi akukhona okokuqala ukuthi uGordhan aphazanyiswe ezokhuluma KwaZulu-Natal. Ngo-Ephreli enkonzweni yesikhumbuzo sikaMnuz Ahmed Kathrada, uGordhan noMgcinimafa-jikelele kaKhongolose uDkt Zweli Mkhize bahhahhanyezwa. Nakhona lapho kusolwa amalungu e-ANCYL.
Umkhuba omubi lona futhi kufanele wonke umuntu oweseka intando yabantu awugxeke. Siwumphakathi kufanele singakuvumeli ukusetshenziswa kwemikhuba ephambene nentando yabantu ukulwa nezitha.
Uma singathula, singawugxeki lo mkhuba kuzogcina sekusixaka. Yingakho nje silindele ukuthi abaholi be-ANC baphenye ngalesi senzo esenyanyekayo bese bethathelwa izinyathelo labo abazotholakala benecala.