Bhekelani impilo yabahamba ngezimoto zenu
MHLELI: Ngithatha leli thuba ukuphawula ngento esijwayelekile emphakathini ubungozi bayo obunganakwa ekubeni umphumela wayo uyokhalisa abaningi ngelinye ilanga.
Kunale nto yamatekisi namaveni agibelisa izingane zethu. Hheyi bakwethu ayive inomsindo imisakazo edlala kuwona. Sekuyifeshini ukuthi kufanele agqome asho ngomsindo oqhuma phezulu izingane zigcwele zichichima kuwona.
Ngokocwaningo, lomgudu wozokuzwa (hearing process) kuthiwa lo msindo ongaka uyawabulala ama -cells okuzwa aphele kancane kancane.
Umonakalo awusheshi ukubonakala kodwa kuthi lapho inkinga yokuzwa isivela kusuke sekungekho okungenziwa, isimo sisuke sesingeke sisabuyiselwa emuva.
Kuyothi uma izingane seziqala ukufunda emazingeni aphezulu umonakalo uyobe usumkhulu kakhulu. Kusho ukuthi izingane eziningi kuyodingeka ukuthi zithole usizo lokwelashwa ukuze ziqhubeke nempilo.
Kubuhlungu kimina ukubona impilo yezingane zethu ishabalala kancane kancane ishabalaliswa abantu abanye babo abangazange bafike kwakufika emazingeni emfundo engikhuluma ngawo noma abangayikhathalele impilo yezingane zethu.
Sicela abanikazi bamatekisi nabashayeli bawo bangacabangi ngokungena kwemali nje kuphela kuleli bhizinisi labo kodwa babhekele nempilo yabantu abahamba ngalezi zimoto zabo.
Ngiphakamisa ukuthi uhulumeni abeke nemigomo ezolawula umsindo kulezi zimoto ezithutha izingane futhi bajeziswe abawuphulayo ngoba ikusasa lezingane zethu leli elimoshekayo. Izwe lethu libuswa ngemithetho, ngakhoke mawufakwe nozolawula lesi simo engikhala ngaso.